„Во следниот период треба да продолжиме со инвестициите во фотоволтаици, но треба да се насочиме и кон инвестиции во батерии и да се работи на поедноставување на регулативата за поставување батерии“, посочи Марко Бислимоски, претседател на Регулаторната комисија за енергетика и водни услуги (РКЕ), на 14-от бизнис-форум „Енергетската сегашност и иднина“, кој се одржа вечерва во организација на ротари-клубот „Скопје-Центар“.
„Сите инвестиции се насочени кон обновливи извори на енергија и тоа треба да продолжи, но ни треба базна енергија. Во моментов базната енергија ја обезбедуваме од термоцентралите од јаглен и треба да сме реални за нивниот животен век, затоа што не може да очекуваме од пензионери да трчаат маратон. Тоа е невозможно. И никој нема да ни даде финансии да инвестираме во нови термоцентрали, но она што треба да го направиме е да го обезбедиме природниот гас за производство на електрична енергија и таа треба да ни биде базна енергија“, укажа Бислимоски.
Како што истакна претседателот на РКЕ, поради енормните цени на берзата на струјата и природниот гас, енергетиката стана тема и сега е одлична шанса за сите да ја насочат енергијата и да се инвестира во она во кое не се инвестирало 30 години.
„Без енергетика нема економија, без економија нема држава. Кога зборувам за енергетиката во последните 30 години, приватниот сектор, за разлика од државата, повеќе инвестираше. Од средината на минатата година, кога екстремно се зголемија цените на струјата и гасот, енергетиката стана главна тема, а дотогаш сите проблеми беа ставени под тепих. Сите инвестиции што се најавуваат ќе се реализираат и ќе придонесат за зголемување на енергетската независност, што е одлично. Но на граѓаните им треба струја сега. Во минатото бевме сведоци на евтин популизам за ценовна стабилност и отсуство на инвестиции. Денес е дојдено време кога сите тие неинвестиции ќе се платат. Да се инвестирало во последните 30 години, од увозно зависни ќе станавме извозници“, рече Бислимоски.
.webp){kind=icon}
