Неколку македонски банки можат слободно да им конкурираат на агенциите за недвижности, со оглед на тоа што се долги листите во нивното портфолио на недвижности наменети за продажба, а кои се запленети по основа на неплатени кредити. Меѓу недвижностите што ги продаваат банките има станови, куќи, ниви, но и огромни производствени погони, деловен простор и хотели што им припаѓале на компании што некогаш важеле за гиганти во Македонија.
„Блумберг Адрија“ ги избра моментално најскапите деловни објекти што ги продаваат банките, а чии сопственици биле препознатливи компании на македонскиот пазар.
Убедливо највредна недвижност што се продава е фабриката за производство на порцелан во Велес (поранешна „Порцеланка“), која ја нуди Комерцијална банка. Станува збор за 41 објект, со вкупна површина од 77.473 квадрати. Проценетата вредност на оваа недвижност е 7,3 милиони евра, а се продава по цена од 4,8 милиони евра.
Втора на листата на највредни деловни објекти, која ја продава НЛБ банка, е управната зграда на градежната компанија „Бетон“ во Скопје, која се наоѓа веднаш зад Министерството за економија. Станува збор за објект што се продава во рамките на извршна и стечајна постапка на компанијата, која некогаш важеше за една од најголемите во градежниот сектор. Недвижноста се простира на површина од над 6.000 квадрати и има вредност од безмалку пет милиони евра.
Управната зграда на „Бетон“
„Во рамките на недвижноста се наоѓаат подвижни предмети, машини и опрема-канцелариски мебел и систем за видеонадзор, систем за заштита од провала и кражба, систем за заштита од пожар, лифтови, комплет систем за греење и ладење – климатизација и вентилација, со моментална вредност од 318.963 евра. Некои од подвижните предмети се наоѓаат во недвижноста и претставуваат функционална целина“, напоменуваат од НЛБ банка.
На листата на недвижности што ги продава НЛБ банка се наоѓа и комплексот фабрика за месна индустрија „Мега“, кој се наоѓа во индустрискиот дел на селото Трубарево, во околината на Скопје. Предмет на продажба се десетина објекти, меѓу кои производствен погон со површина од 6.428 квадрати, пушници и ходник-мансарда со површина од 1.459 квадрати, компресорска станица, машински оддел, магацин, платформа за утовар и истовар, управна зграда и други помали недвижности.
„Мега“
Комплексот располага со комплетна опрема и машини за производство и преработка на сувомесни производи. Во целината за продажба на имотот е вклучена и продажба на опрема и машини, а вкупната продажна цена на имотот, заедно со опремата и движниот имот, изнесува 4,1 милиони евра.
Уште еден објект за административна, деловна и магацинска намена во сопственост на „Промес“, некогаш еден од најголемите играчи во месната индустрија, е на листата за продажба на Шпаркасе банка. Станува збор за деловна зграда во стопански двор во поширокото подрачје на градот, комунално, инфраструктурно, партерно и хортикултурно опремена. Вкупната површина на земјиштето изнесува 4.454 квадрати, а вкупната површина на објектите е 2.762 квадрати. Цената е по договор.
„Промес“
Силк роуд банка го продава хотелот „Илинден“ во Крушево. Хотелот е изграден како планинско рекреативно одморалиште со 4 ѕвезди во далечната 1949 година, а целосно е реновиран и дограден во 2017 година. Површината на стариот хотел изнесуваше 2.400 квадрат, а дополнително се изградени 2.164 квадрати. Хотелот има сместувачки капацитет од 47 единици, составен од апартмани, студија и двокреветни соби и девет големи двокатни апартмани на последниот кат.
Хотел „Илинден“
Јавните површини се состојат од лоби, кафетерија и бар, два ресторана, конгресен центар, вински клуб, затворен базен со фитнес-објекти за гостите на хотелот и спа-центар отворен за хотелски и надворешни гости, со сопствен паркинг-простор. Хотелот се продава по цена од околу 1,1 милион евра.
Забележително е дека повеќето објекти подолг период се наоѓаат на листите на продажби на банките, што укажува дека тие имаат проблем да го впаричат имотот што го презеле врз основа на ненаплатени долгови.
.webp){kind=icon}
Во моментов нема коментари за веста. Биди прв да коментира...