Законското решение со кое е уредено дека недела е неработен ден и кое е во сила нема бизнис логика, велат од Стопанската комора и додаваат дека не се откажуваат од барањата за прилагодување на законските одредби. Уставниот суд минатата недела одлучи да не поведе постапка за измените на Законот за работните односи во кој беше оспорено работењето во недела. Сепак од комората сега велат дека тоа не е причина да не ги продолжат разговорите со Владата, за да се конципира ново законско решение што ќе биде прифатливо за сите.
„Во моментов, законското решение што е во важност, нема бизнис-логика, а има многу можности за негово прилагодување, кои не се спротивни на Уставот. Притоа ги имаме предвид компаративните искуства од опкружувањето, па дури и од членките на ЕУ, каде што работата во недела не е ограничена на ваков начин како кај нас, а сепак не е спротивна на уставните принципи. Во тој правец ќе дејствуваме и ние во следниот период, стои во соопштението од Стопанската комора на Северна Македонија.
Уставниот суд на седницата одржана во четвртокот минатата недела одлучи да не поведе постапка за предметот во кој беше оспорено работењето во недела. Тоа значеше дека во правниот поредок останува Законот кој го уредува правото на работниците да не работат во недела, освен во дејностите кои се исклучоци, а секако се предвидени со сегашното законско решение.
„За Уставниот суд неосновани се наводите на Стопанската комора на Северна Македонија која е подносител на оваа иницијатива и која бараше да се запре извршувањето на овој Закон. Оваа одлука е конечна и секој мора да ја почитува, нагласи Христина Беловска, портпарол на Уставниот суд.
.webp){kind=icon}
