Голем број македонски граѓани можеби никогаш не чуле за Сент Винсент и Гренадини или за Џерси иако станува збор за дестинации од кои во изминативе години има значителен прилив на странски директни инвестиции во Македонија. Податоците на Народната банка покажуваат дека вкупната сума инвестиции во земјава од острови од Карибите и други локации кои важат за офшор даночни раеви воопшто не е за потценување.
Имено, од Бахамите се регистрирани инвестиции од 85 милиони евра, а од Британските Девствени Острови инвестиции од дури 135 милиони евра. Листата продолжува со Кајманските острови (11,5 милиони евра), Сент Винсент и Гренадини (40 милиони евра), Џерси (20,5 милиони евра)...Вкупната сума e приближно 300 милиони евра.
Всушност, инвестициите што влегле во Македонија од даночните раеви се многу поголеми од инвестициите што влегле од некои европски земји или од држави од соседството.
Инаку, заклучно со минатата година состојбата на директни инвестиции во Македонија изнесува 6,29 милијарди евра (или 53,7 проценти од проценетиот податок за БДП) од кои 4,64 милијарди евра се вложувања во сопственички капитал, додека 1,65 милијарди евра се вложувања во должнички инструменти.
Анализирано по земји, највисоки директни инвестиции, во вредност од 913 милиони евра се регистрирани од Австрија, по што следува Обединетото Кралство, со директни инвестиции во вредност од 652 милиона евра. Во групата на пет најголеми странски инвеститори во земјата спаѓаат и Грција (со 612 милиона евра), Холандија (со 503 милиони евра) и Германија (со 471 милион евра). На овие пет земји отпаѓа 50 проценти од вкупните директни инвестиции во анализираниот период.
Во однос на дејностите на инвестирање, од вкупните директни инвестиции, 2,1 милијарди евра или 34,8 проценти се инвестирани во дејноста „производство”, додека 1,3 милијарди евра или 21,6 проценти во дејноста „финансиски и осигурителни активности”.
.webp){kind=icon}
