Градоначалникот на Штип, општината што требаше да биде прва во Македонија што издала обврзница за да обезбеди пари за капитални инвестиции, вели дека политиката го уништила нивниот план, но најавува нов обид за идната година.
„Пред да започне процедурата за издавање обврзница, Општина Штип започна постапка за реализација на капитални проекти од развојната програма што во минатото не се реализирани затоа што нема можност од тековниот буџет да се реализираат развојни капитални проекти. Во време на инфлација одлучивме обврзницата да биде начин на финансирање едни вакви капитални проекти што ќе генерираат развој во време на енергетска и финансиска криза. Ги проследивме сите потребни постапки од одлука на Советот, вративме предвреме долг што Општина Штип од минатото го влечела со години кон Министерството за финансии. Добивме позитивно мислење во Комисијата за хартии од вредност, како и од Македонската берза, и тоа што требаше само да биде техничка одлука на седница на Владата, да потврдат дека постоиме како институција во рамките на Македонија, ни беше ускратено без никакви наведени причини. Искрено, тоа ни создава демотивација затоа што ни се ускратени можноста и правото за финансирање капитални проекти. Ова беше една идеална можност во време кога постои инфлација да издадеме обврзница со која ќе ги финансираме овие проекти, а на тој начин ќе превенираме инфлацијата да ја зголеми цената на чинење на проектите што би ги реализирале од тековниот буџет етапно неколку години по ред“, објаснува за Блумберг Адрија ТВ градоначалникот на општината Штип, Иван Јорданов.
Иако по ваквиот развој на настаните градоначалникот вели дека се демотивирани, сепак не ја отфрла можноста за нов обид за издавање обврзница следната година.
„Веќе следната година Министерството за финансии ќе има можност да издаде ново мислење за ликвидноста на Општина Штип, да ја разгледа реализацијата на буџетот за 2022 година, а следствено на тоа да даде позитивно мислење. Постои опција ние повторно да поднесеме барање затоа што сè уште немаме повратен одговор зошто не е ставена точката на дневен ред на седница на Владата, но, верувајте, демотивирачки е за нас да го водиме тој процес затоа што однапред знаеме дека ќе ни биде ускратено тоа право од политички причини“, вели градоначалникот Јорданов.
Градоначалникот на Штип зборува и за состојбата со користењето струја од регулираниот пазар за улично осветлување и за владината наредба општините да се вратат на слободниот пазар.
Целиот разговор за Блумберг Адрија ТВ со Иван Јорданов, градоначалник на Штип, погледнете го во видеото.
.webp){kind=icon}
