Со стопанските комори се води дискусија за нов, вонреден данок на екстра добивка, по примерот на европските земји.
Оние компании што имаат приходи над 10 милиони евра на годишно ниво, при што тоа е 20 отсто повеќе од четиригодишниот просек, дополнително да им се оданочат екстра приходите, посочи министерот за финансии, Фатмир Бесими во интервју за Радио Слободна Европа, во однос на планираната мерка.
Во оваа насока тој откри дека веќе имал состанок со стопанските комори и најави дека ќе се одржи уште една средба, поточно консултација со нив, посочувајќи дека тоа не е дел од даночната реформа.
„Дискусијата што сега се води со коморите е во однос на посебен, нов вонреден данок, а тоа е данок на дополнителна екстра добивка, што значи дека по примерот на другите земји, како Велика Британија, Италија, Унгарија, Хрватска... Дури има и директива, препорака од земјите членки на ЕУ, земјите да оценат и да го користат тоа во вид на солидарност. Тоа што ние сега го дискутираме со стопанските комори е дека во последните четири години оние компании што имаат над 10 милиони евра приходи на годишно ниво и ќе се спореди нивната добивка во текот на 2022 година и делот што е остварен над 20 отсто во последните четири години, само тој дел ќе биде предмет на оданочување со овој нов данок, еднократен, само за 2022 година и нема да се повтори. Годините каде што немаат остварено добивка не се земаат предвид за оданочување“, посочува Бесими во интервјуто за Радио Слободна Европа.
.webp){kind=icon}
