На бизнисот му недостига пристап до фондови за инвестиции и развој, особено во услови на неколку последователни кризи, смета Билјана Караманолевска, генерална менаџерка на детските градинки „Светот на Колорес“, годинешна жена менаџер во рамките на конференцијата „Жени претприемачи“.
„До пред некое време жените беа малцинство, со ниска застапеност на учество во претприемаштвото. Сега сè почесто и сè повеќе има мерки за стимулирање на претприемачкиот дух кај жените. Но моментално се соочуваме со недостиг од финансиска помош за развој или пристап до грантови и инвестициски фондови што ќе станат подостапни за сите нас“, вели Билјана Караманолевска во разговор за „Блумберг Адрија“.
Караманолевска вели дека е неминовно да се почувствуваат последици врз бизнисот во услови на повеќе кризи, но сепак успеваат да се изборат со нив.
„Во однос на енергетската криза, инфлацијата и другите економски проблеми, како и сите бизниси, така и нашиот трпеше одредени приспособувања. Пандемијата успеавме да ја надминеме, но гледаме нова криза што допрва доаѓа и ќе треба да ја надминуваме. Како градинки сме исклучително подложни на сите овие глобални движења, пред сè тука се цените на прехранбените производи, на струјата, растот на инфлацијата. Од друга страна, ние се соочуваме со стравот кај секое семејство од губење на работното место, од намалување на приливот на средства, можноста за инвестирање и слично. Засега сè уште има интерес, но почнуваат да се интензивираат стравот од страна на родителите и двоумењето дали да ги чуваат парите или да инвестираат во приватна градинка“, вели Караманолевска, иако потенцира дека засега состојбата во нивниот сектор е сè уште стабилна.
Целиот разговор погледнете го во видеото.
.webp){kind=icon}
