text size
Приватниот сектор, мора да придонесе во решавање на најголемите предизвици кои се пречка за инвестициите, ги попречуваат иновациите и креираат економска нестабилност, порача американската амбасадорка во земјава, Анџела Прајс Агелер, пред бизнис заедницата во рамки на обраќањето на почетокот на регионалната конференција на тема: „Како да се обезбеди поголема соработка помеѓу економиите од Западен Балкан - предизвици и можности“.
„Барајте владеење на правото, помогнете во борбата со корупцијата и лобирајте за подобрена инфраструктура и поврзаност во регионот“, рече Агелер пред стопанствениците.
Покрај неа, обраќања пред конференцијата, која се одржува како дел од проектот „Поддршка на приватниот сектор за регионална интеграција” во партнерство со УСАИД, имаа и претседателот на Стопанската комора, Бранко Азески и вицепремиерот задолжен за економски прашања Фатмир Битиќи.
Азески во своето обраќање кажа дека во нашиот регион историјата и политиката сè уште се доминантни во однос на економијата и бизнисот.
СКСМ
„На балканските политички елити 30 години им беше потребно да сфатат дека регионалната политика и пристап во работењето не е враќање кон старата Југославија, туку приклучување кон западните прогресивни вредности и дека за успешна регионална интеграција потребни се иницијативи од самите земји во регионот на Западен Балкан, по успешниот пример на Вишеградската група. Не само што сме поединечно мали, туку и вака здружени во Западен Балкан ние сме како регион мали. Тоа значи дека треба да вложуваме максимални напори за да ги подобриме сите перформанси кои се битни за зголемување на извозот и за создавање на конкурентни производи кои со својата цена, со својот квалитет, ќе можат да се носат со конкуренцијата на другите пазари. Ако тоа не го правиме ние го доведуваме во прашање развојот на бизнисот“, порача претседателот на Стопанската комора.
Вицепремиерот Битиќи, пак, посочи дека регионалната соработка овозможува раст и развој на економите.
„Предизвиците не се пречка, тие се шанса за заедно да ги надминеме и заедно да ги мултиплицираме шансите и можностите кои се отвораат пред нас, Продлабочувањето на економската интеграција и соработка помеѓу државите од Западен Балкан преку сите постоечки иницијативи е приоритет на сите народи од нашиот регион. Ова треба да биде Балканот на 21-от век. Регионалната конкурентност е клучот кој ја отвора вратата за просперитет на Западен Балкан“, нагласи тој.
Во рамки на Конференцијата се реализираше и панел дискусија со фирми од регионот на Западен Балкан во насока на истакнување на позитивните примери и добрите пракси, како и за можностите, проблемите и предизвиците за зголемување на регионалната соработка. Беше презентирана и Студија за можностите за поттикнување на поголемо ниво на регионална соработка, чиј креатор професор д-р Дарко Лазаров главен експерт и претседател на Клубот на извозници при Комората, ги презентираше можностите за интензивирање на трговската размена помеѓу земјите од Западен Балкан.
СКСМ
Преку проектот „Поддршка на приватниот сектор за регионална интеграција”, УСАИД ја поддржува Стопанската комора на Северна Македонија во напорите да овозможи подобра интеграција на бизнисите во регионалните и глобалните вредносни синџири и засилување на нивниот капацитет за да бидат конкурентни на Западниот Балкан и пошироко во ЕУ.
.webp){kind=icon}
