Се зголемуваат замрзнатите цени на зеленчукот и овошјето

Владата денеска донесе одлука со која се коригираат некои од замрзнатите цени на овошјето и зеленчукот. Како што изјави министерот за економија Крешник Бектеши, во согласност со одлуката, килограм домати и краставици ќе чинат максимум 95 денари, килограм пипер до 100 денари, килограм грав 95.

Кромидот поскапува за десет денари и ќе биде 70 денари, а само леќата, како што истакна Бектеши, ќе биде над 100, односно ќе се продава по 110 денари за килограм.

Според владината одлука, килограм банани ќе чинат до 75 денари, килограм портокали до 60, килограм мандарини до 65 и килограм лимони до 60 денари. 

„Контролите ќе продолжат, ситуацијата ќе се следи секојдневно и ако е потребно, повторно ќе се интервенира доколку забележиме намалени увозни цени. Граѓаните да бидат спокојни“, истакна министерот.

Бектеши очекува дека ќе се почитува одлуката што е донесена зашто, како што напомена, последната недела се забележани зголемени увозни цени за над 30 отсто на одредени производи - домати, краставици, кромид и грав. 

„Овие фактури што веќе се доставуваат во Царинската управа се пологични од претходните, но ова не значи дека тука завршуваат контролите и инспекциите“, подвлече Бектеши. 

Ваквото ограничување на највисоките цени на овошјето и на зеленчукот во трговијата на мало, останува да важи до 30 април 2023 година, а ќе стапи во сила по објавувањето во „Службен весник“, посочуваат од ресорното министерство.

Во моментов нема коментари за веста. Биди прв да коментира...

Остави коментар