Нови 600 работни места ќе бидат отворени за околу една година со новата инвестиција на канадската компанија „Магна“, која, по отворањето на фабриката во Струга, денеска официјално го означи почетокот на својата втора инвестиција во Штип.
Според премиерот Димитар Ковачевски, доаѓањето на познати странски компании е доказ дека во земјава има поволна бизнис-клима и тоа ќе ѝ донесе повисок инвестициски рејтинг на државата, како и отворање нови и подобро платени работни места.
„Со заедничкиот концепт на Владата и на ТИРЗ, и во време на глобални предизвици постигнавме договори од над 850 милиони евра инвестиции, што е речиси две третини од вкупниот обем на донесени инвестиции во претходните 10 години“, истакна премиерот во своето обраќање.
Потпретседателот на „Магна интернационал“, Дејвид Креспи, рече дека втората нивна фабрика во земјава претставува уште една одредница кон проширување на работата и способноста во регионот, како и поддршка на клиентите со иновативни производи од светска класа.
„Благодарни сме за поддршката што ни ја дава Владата и остануваме посветени на истражување дополнителни можности за раст“, рече Креспи.
Директорот на Дирекцијата за технолошки индустриски развојни зони, Јован Деспотовски, нагласи дека е задоволство по една година преговори да се присуствува на камен-темелник за новата фабрика на „Магна мехатроникс“.
„Со оваа инвестиција обезбедуваме право на пристоен живот најмалку за 600 наши сограѓани од овој регион, со плати 20 проценти над државниот просек“, изјави Деспотовски.
„Магна интернационал“ е една од реномираните светски компании, која е специјализирана да дизајнира, развива и произведува автомобилски системи, модули и компоненти што им се испорачуваат на сите позначајни производители на автомобили во светот.
.webp){kind=icon}
Во моментов нема коментари за веста. Биди прв да коментира...