За сите вработени во јавниот сектор ќе се воспостави методологија за плати што ќе биде системско решение и гарантирано право на вработените во јавниот сектор во однос на заштита од инфлација и следење на продуктивноста на економијата, односно конкурентноста на стопанството, повтори денеска министерот за финансии Фатмир Бесими.
Тој нагласи дека интензивно се дискутира за методологијата за плати во јавниот сектор што ќе биде системско решение и тоа што ќе биде договорено со синдикатите ќе важи за сите. Министерот додаде дека не може да прејудицира кога и како ќе завршат преговорите. Откако ќе завршат преговорите, најави дека ќе треба одреден транзициски период за да се имплементира решението во буџетот.
„Во фаза сме на преговори во рамките на економско-социјалниот дијалог што се води во Владата, на кој присуствуваат три страни – Владата во конкретниот случај како работодавец, синдикатите на работниците во јавниот сектор и Организацијата на работодавци. Таму се водат преговори. Принципиелниот став за кој сме усогласени е дека се работи на потпишување и усогласување на општ колективен договор што ќе важи еднакво за сите вработени во јавниот сектор. Очекуваме да се усогласиме во однос на ставовите“, рече министерот во одговор на прашање пред почетокот на презентацијата на извештајот од петтиот круг на евалуација на системот за спречување на перењето пари и на финансирањето тероризам на Република Северна Македонија, усвоен од страна на комитетот „Манивал“ при Советот на Европа.
МИА
Министерот порача дека се водат интензивни преговори со сите синдикати од јавниот сектор.
„Клучно е да имаме системско решение што ќе им гарантира статус и стандард на вработените во јавниот сектор, а наедно ќе ја следи и продуктивноста на нашата економија. Се дискутира дали минималната или просечната плата да биде основа за методологијата и откога ќе се реши тоа прашање ќе важи за сите во јавниот сектор, како што направивме претходно со системското решение за минималната плата и пензиите“, кажа Бесими.
Тој посочи дека Министерството за информатичко општество и администрација веќе има предлог-решение за плати во јавниот сектор, кое исто така треба да биде системско решение.
„И годинава има раст на платите во јавниот сектор, и тоа не само раст на минималната плата туку линеарно приспособување на сите што влегоа во Законот за административни службеници и другите што во меѓувреме имаа регулирано колективни договори усогласени со тој закон“, нагласи министерот.
.webp){kind=icon}
