Потрошувачката на лекови на рецепт на товар на Фондот за здравствено осигурување преку аптеките бележи континуиран раст во изминатите години. Во 2022 година на товар на Фондот во ПЗУ аптеките биле реализирани вкупно 25.013.389 рецепти во износ од 2.826.232.596 денари (45,9 милиони евра).
Просечната потрошувачка на лекови според бројот на реализирани рецепти по осигуреник за 2022 година е 13,5 рецепти, што претставува намалување од околу 1,86 проценти во однос на 2021 година.
„Во 2022 година, во сите региони се забележува зголемување на просечниот број на реализирани рецепти по осигуреник во однос на 2021 година, со исклучок на Југоисточниот регион каде има незначително намалување за помалку од 1 проценти“, се вели во извештајот на Фондот за здравствено осигурување за минатата година.
Најголема потрошувачка на лекови според бројот на реализирани рецепти по осигуреник, а соодветно на тоа и според просечниот износ по осигуреник, е забележана во Источниот регион со 16,4 рецепти по осигуреник, со просечен износ од 1.775,3 денари. Најмала потрошувачка на лекови според бројот на реализирани рецепти по осигуреник е забележана во Полошкиот регион со 10,6 рецепти по осигуреник. Просечниот фактуриран износ по осигуреник за 2022 година на ниво на државата изнесува 1.524 денари.
Најмногу се користат лекови за заболувања на кардиоваскуларниот систем
Како и во изминатите години, и во 2022 година на прво место по бројот на реализирани рецепти и според вкупниот фактуриран износ се лековите за третман на заболувања на кардиоваскуларниот систем.
„Исто како и во 2021 година, и во 2022 година има незначително намалување на бројот на реализирани рецепти за лековите од оваа група и тоа за 1,4 проценти, додека пак вкупниот фактуриран износ е зголемен за околу 1 процент. Во 2022 година се реализирани околу 10,3 милиони рецепти во износ од 718,7 милиони денари (11,6 милиони евра).“, информираат од Фондот.
На второ место, според бројот на реализирани рецепти, во 2022 година се лековите со дејство на дигестивниот тракт и метаболизмот. Додека според вкупните фактурирани износи на второ место се лековите кои делуваат на респираторниот систем. Лековите со дејство на централно-нервниот систем се на трето место и според бројот на реализирани рецепти и според вкупниот фактуриран износ. Потрошувачката на антиинфективните лекови (антибиотици, антимикотици, антивирусни лекови), кои се наоѓаат на четврто место според бројот на реализирани рецепти, во 2022 година е зголемена за 10,7 проценти во однос на 2021 година.
Кои се најкористени лекови?
Најкористен лек во 2022 година, како и во претходните години е лекот „еналаприл“ (enalapril) со приближно 1,83 милиони реализирани рецепти, односно за 5,66 проценти помалку во однос на претходната 2021 година. Овој лек учествува со 7,3 проценти во вкупно реализираните рецепти во 2022 година.
„Лекот со генеричко име „еналаприл“ спаѓа во групата кардиолошки лекови кој се применува во третман на хипертензија. На првите 10 најкористени лекови на товар на Фондот, според бројот на реализирани рецепти, отпаѓаaт околу 45,5 проценти од вкупниот број на рецепти реализирани во 2022 година“, информираат од Фондот.
Според статистиката на Фондот, на второто место на листата најкористени лекови е „метформин“(metformin), кој се користи за третман на дијабетес и за кој лани биле издадени околу 1,8 милиони рецепти. На третото место е лекот „диазепам“(diazepam) за кој лани биле издадени безмалку 1,4 милиони рецепти. „Диазепамот“ е лек за смирување и се користи за лекување на широк спектар на болести и состојби проследени со анксизност, страв, немир, напнатост, несоница, напади на паника како и кај мускулни грчеви, апстиненцијален синдром кај зависност од алкохол и опиоиди и невротски растројства.
Инаку, според податоците на Фондот, лекот „росувастатин“ (rosuvastatin) е на прво место според вкупниот износ и за него во 2022 година се фактурирани вкупно 170,2 милиони денари(2,7 милиони евра), што претставува околу 6,02 проценти од вкупниот износ за лекови, и зголемување од приближно 11,6 проценти во однос на вкупниот износ за овој лек во 2021 година. Овој лек спаѓа во групата на кардиолошки лекови што го намалуваат нивото на масти во серумот.
.webp){kind=icon}
