text size
Министерот за финансии Фатмир Бесими денеска во Македонската берза, заедно со извршниот директор Иван Штериев, симболично, со заѕвонување на ѕвоното, го означи почетокот на тргувањето со граѓанската обврзница. Првата емисија на граѓанска обврзница беше издадена во текот на месецов, при што на аукцијата одржана на 13 јули беа запишани вкупно 1.448.030.000 денари.
„Граѓаните што учествуваа на аукцијата на 13 јули 2023 година, од денеска можат да тргуваат со своите граѓански обврзници преку Берзата, односно имаат можност, доколку сакаат парите што ги инвестирале да ги добијат пред истекот на обврзницата, тоа да го направат преку Берзата. Од друга страна, тоа дава можност граѓанската обврзница да се купи од страна на оние што не успеале да учествуваат на аукцијата на 13 јули“, рече министерот Бесими.
Граѓаните ќе можат да тргуваат со граѓанската обврзница преку банките (Комерцијална банка, НЛБ банка, Стопанска банка АД Скопје, ТТК банка и Шпаркасе банка) и брокерските куќи.
МИА
„Граѓаните ги препознаа предностите на овој нов иновативен производ што го понудивме на финансискиот пазар. На првата емисија интересот беше 2,5 пати поголем од објавениот износ и сè уште има интерес од граѓаните, од кои добиваме прашања кога и како можат да купат граѓанска обврзница. Беа запишани вкупно 1.448.030.000 денари од страна на 1.283 граѓани. Минималниот износ со кој можеа да учествуваат граѓаните на аукцијата, која се одржа на 13 јули, беше 10.000 денари, односно купување една обврзница, а каматата што ќе ја добијат граѓаните што купија граѓански обврзници е пет отсто на годишно ниво, односно вкупно 10 проценти за двете години. Приносот ќе им биде исплатен на 20 јули 2024 и 20 јули 2025 година“, истакна министерот.
Главниот извршен директор на Македонската берза, Иван Штериев, посочи дека котацијата и почнувањето со тргување на Берзата со граѓанските обврзници, покрај тоа што на нивните иматели ќе им обезбедат централизирано место за нивно продавање и купување, претставуваат и проширување на понудата на финансиски инструменти на нашиот пазар.
„Големиот интерес за купување на овие обврзници при примарната емисија ја потврдува тезата на Берзата дека побарувачка за квалитетни и атрактивни инструменти на пазарот и тоа како постои - треба само да се сака и да се знае како да се искористи тоа. Со издавањето на граѓанската обврзница, Министерството за финансии го препозна тоа и дејствуваше во вистински правец. Се надеваме дека ова е само почеток и дека ќе следуваат нови вакви или слични емисии на државни хартии од вредност, при што Берзата, како институција и инфраструктура, е секогаш подготвена да ги поддржи овие активности во функција на дополнителен развој на инвестициската култура и македонскиот пазар на капитал во целина“, рече Штериев.
Како што информира Министерството за финансии, граѓанската обврзница како безризичен и сигурен инструмент за граѓаните ќе биде присутна на пазарот во континуитет и се планира до крајот на годината да се издаде уште една емисија.
.webp){kind=icon}
