.webp){kind=icon}
Дефектот на Блок 2 на РЕК Битола е саниран синоќа, откако поради испад на блокот комбинатот не произведуваше струја изминативе денови, соопштија од АД ЕСМ.
„По непрекината работа на вработените во ПE Термоелектрани на РЕК Битола, отстранети се последиците од испадот на блокот, предизвикани од силното невреме што завчера ја зафати Пелагонија и постројката е ставена во функција“, стои во соопштението.
Од компанијата додаваат дека согласно планот за производство на АД ЕСМ, РЕК Битола ќе продолжи со работа со еден блок и во претстојниот период.
„Изнесените наводи во соопштенија на различни партиски тела, пренесени во дел од медиумите, кои се однесуваат на причините за испадот на блоковите и за состојбите во РЕК Битола деновиве, не заслужуваат било каков коментар бидејќи не само што се апсолутно неточни, туку се и под секое ниво на комуникација во јавниот простор“, стои во соопштението.
Претходно, од АД ЕСМ за МИА потврдија дека во текот на четвртокот, поради дефект на Блок 2 на РЕК Битола, комбинатот не произведува струја и оти се работи на отстранување на причината за испад на блокот.
