Американската компанија „Вабтек“ е новата странска инвестиција што ќе вложи 35 милиони евра во земјава и со која ќе се отворат 100 работни места. Компанијата ќе инвестира во производство на сопирачки за шински возила.
Името на новата инвестиција го објави премиерот Христијан Мицкоски, кој во Вашингтон имал средба со извршниот потпретседател на компанијата.
„Компанијата 'Вабтек' е дел од петстоте најголеми компании во САД. Остварив средба со извршниот потпретседател на компанијата во Вашингтон, каде што беше потврдена динамиката на реализација на новата инвестиција. Повеќе од сто нови вработувања, инвестиција вредна 35 милиони евра. Ќе се инвестира во производство на сопирачки за шински возила“, напиша Мицкоски во објава на социјалните мрежи.
По најавата за инвестицијата, реагираа од политичката партија СДСМ, од каде што велат дека компанијата „Вабтек“ веќе 16 години работи во земјава и дека всушност станува збор за барање на компанијата за проширување на операциите во државата.
„За ова нивно барање се водеше постапка одамна во рамките на институциите кај нас, при што поради негативно мислење на Комисијата за заштита на конкуренција, тоа не се реализира. Во рамките на овој процес имаше и судска постапка“, посочуваат од партијата, од каде што го повикаа премиерот да ги објави условите под кои ќе го проширува производството на „Вабтек“ и што точно е договорено со компанијата.
*Текстот е дополнет со реакцијата од СДСМ.
.webp){kind=icon}
