Наш главен приоритет како влада е економијата и, во овие повеќе од четири месеци откако ги презедовме функциите, мислам дека со однесувањето досега се обидуваме да ја смениме перцепцијата, порача претседателот на Владата, Христијан Мицкоски, на отворањето на конференцијата на „Блумберг Адрија“, под наслов „Back to business: Економски потенцијал и развојни можности на Македонија“. Говорејќи за стратегиските приоритети на Владата во областа на економијата, Мицкоски рече дека се обидуваат да ја растераат маглата на т.н. условна политичка доминација и корупција.
„Ако вие, како бизнис, сте поуспешни, ние како влада ќе имаме повеќе пари во буџетот да им испорачаме на граѓаните, а ако граѓаните се задоволни од тоа што им го испорачуваме, можеби одново ќе нѐ одберат. Вака отприлика треба да изгледа приказната. Затоа сакаме да нè гледате како ваш сојузник и да ни се обратите секогаш кога мислите дека може некако да помогнеме“, порача претседателот на Владата, Христијан Мицкоски.
Премиерот смета дека ако се функционира на тој начин, ќе има повеќе инвестиции и ќе се зголеми продуктивноста, која, според него, е можеби на најниско ниво во Европа. А, ако се зголеми продуктивноста, ќе се зголеми и додадената вредност.
„Моја стратегиска цел како претседател на Владата е да бидеме тројна раскрсница во регионот и реално сум фокусиран на тоа. Ние немаме излез на море, ниту природни ресурси, како нафта и гас, и тоа се недостатоци. Умешноста е ние да ги претвориме тие недостатоци во предности, да се поставиме стратегиски и другите да гледаат во нас како партнер каде што може да вложуваат“, посочи премиерот.
„Наша предност се трите основни столба: како да бидеме раскрсница за транспортен пат, железнички и енергетски пат. Тоа треба да биде наша огромна предност наспроти недостатоците што ги кажав. Ние сме природна раскрсница на двата европски главни коридори, коридорите 8 и 10, и тоа мора да го искористиме како геостратегиска предност. Во спротивно нема да успееме и ќе бидеме потпросечни“, изјави премиерот Мицкоски, посочувајќи дека секако има предизвици во реализацијата на плановите.
„Ценам дека ќе биде многу важно да се реализира тоа, не само за нас како држава туку регионално и европски, бидејќи регионов претставува, условно кажано, кичма, а ние претставуваме неколку пршлени и ако тие пршлени не се здрави, не може да функционира ни кичмата“, рече Мицкоски во текот на своето излагање на конференцијата на „Блумберг Адрија“.
Што се однесува на транспортниот пат, коридорот 10 горе-долу е поврзан, а коридорот 8 полека се придвижува и веќе се работи на неколку делници од тој коридор, кој го поврзува истокот со западот, посочи премиерот.
„За железницата, која исто така е приоритетна, очекувам во наредниот период да се потпише четирилатералниот договор што треба да ги поврзе Атина и Виена. Кај нас, за жал, просечната брзина на превоз на стоки преку железница е 30 км на час, а со новиот проект ќе се зголеми на 120 км, што ќе значи поголем проток на возни композиции, повеќе приходи за железниците, а за нас ќе значи помалку пари насочени кон овие претпријатија, со што ќе има повеќе за капитални инвестиции. Сметам дека за пет-шест пати ќе ги зголемат приходите на овие компании и тоа ќе ги направи профитабилни. Тоа значи многу и за државниот буџет и за овие конкретни две компании од железницата“, рече Мицкоски, посочувајќи дека следната година треба да почне промената на шините. Тоа, според него, е стратегиски важно бидејќи ако транспортот на суровините и производите до и од пристаништата во Ротердам и Хамбург се пренасочат и транспортираат до Переа и Атина, тоа ќе го намали времето на транспорт, а со тоа значајно ќе ги намали и трошоците на компаниите.
.webp){kind=icon}
Во моментов нема коментари за веста. Биди прв да коментира...