.webp){kind=icon}
Министерство за дигитална трансформација подготвува измени на Законот за медиуми со кој се предвидува регулирање на онлајн медиумите односно интернет порталите и агрегаторите на вести.
„Издавач на медиум е правно лице кое врши дејност на издавање на печатен медиум, емитување на радио и телевизиски програми (радиодифузери) или публикување информативни содржини преку онлајн медиуми-интернет портали, како и физичко или правно лице кое врши агрерирање вести на посебни интернет страници или мониторирање на медиумите на начин што остварува приходи од давање на овие онлајн услуги“, пишува во нацрт-законот.
Со новата регулатива се предвидува правно или физичко лице да може во Македонија да врши дејност на публикување информативни содржини во вид на текст, аудио или аудиовизуелен формат преку онлајн медиум-интернет портал, доколку дејноста ја впише во Централниот регистар, има седиште и уредништво во земјава, има најмалку две лица во редовен работен однос и поседува мк-домејн.
Исто така се предвидува регистарот на издавачи на онлајн медиуми-интернет портали да содржи податоци за фирмата и седиштето, односно назив и адреса на издавачот на онлајн медиум-интернет портал, име и презиме на одговорното лице на издавачот на онлајн медиум- интернет портал, името на онлајн медиумот-интернет порталот и податоци за сопственикот на мк-домејнот.
„Издавач на онлајн медиум-интернет портал е должен да преземе соодветни мерки со помош на технички средства или со адекватна заштита за ограничување, да оневозможи пристап на малолетните лица до онлајн медиуми-интернет портали со порнографска содржина, како и текстуална, вербална или визуелна содржина со која се глорифицираат физички, вербални или психолошки облици на садизам и слични видови насилство“, предвидува нацрт-законот.
Во образложението на законските измени се вели дека тие се „во насока на усогласување на националното законодавство со законодавството на ЕУ, како и внесување на онлајн медиумите (интернет порталите) во законот“.
