Азески: Гаранцијата од Обединетото Кралство значи многу за македонската политичка и економска стабилност

Гаранцијата што Македонија ја добива од Обединето Кралство за кредитирање значи многу за општата стабилност на државата и за регионот, бидејќи Обединетото Кралство е значаен фактор во светот и на политички и на економски план, вели во својот коментар за инвестициско-економската клима во земјава претседателот на Стопанската комора, Бранко Азески.

„И ваква една земја да гарантира за одредени средства за нашата држава значи дека застанува зад нас и тоа е значаен поттик за политичко средување на состојбите, а и за економската активност. На економски план, секоја инвестициска активност за нас е добредојдена, бидејќи без неа не може да се остварат двете начела на бизнисот, а тоа се компаниите да остварат профит, а граѓаните да го зголемат животниот стандард“, смета Азески.

Азески става акцент и на капацитетот на државата да ги искористи парите понудени во согласност со гаранцијата, но и на капацитетот на домашните компании да се вклучат во инвестициските активности. Тој посочува дека Стопанската комора во овој период е целосно насочена кон тоа да им помогне на компаниите да се оспособат за непречено да се вклучат во таа работа и дека за секој нов проблем со кој ќе се соочуваат фирмите, Комората ќе се вклучува во наоѓање решение.

„На пример, за заедничкиот настап на компаниите за учество на меѓународните тендери градиме конзорциуми и иницираме формирање конзорциуми, а кај образованието за потребите на бизнисот работиме на формирање кадар онаков како што бараат компаниите. Работиме и на поддршка на компаниите за заеднички настап на трети пазари, заеднички производи, на извозната активност“.

На крајот, Азески вели дека железницата е рак-рана на македонската инфраструктура, а ние се наоѓаме на коридор што има транзитна позиција и е значаен за поврзување на Централна Европа и Медитеранот со Блискиот Исток. „Само ние сѐ уште имаме повисока цена на транспорт со камионски превоз од железнички“, вели претседателот на Стопанската комора.  

Во моментов нема коментари за веста. Биди прв да коментира...

Остави коментар