.webp){kind=icon}
Сојузот на синдикатите на Македонија (ССМ) поднесе тужба против државата и Владата заради непочитување на Законот за минсимална плата со што се дискриминирани голем број на вработени во јавниот сектор. Согласно законот, Владата требаше да ги зголеми платите на работниците за 18,4 отсто за минималната плата да стигне до 18.000 и во јавниот сектор односно да биде иста како таа што се исплаќа во приватниот сектор.
„Владата не го направи тоа за сите вработени во јавниот сектор, односно паушално и без критериуми платите некаде не се зголемуват воопшто, а некаде се зголемуваат за одредени категории на вработени наспроти други категории на вработени. Постапувајќи на овој начин Владата го наруши принципот на еднаквост на граѓаните и работниците кој е уреден во член 9 од Уставот на Република Северна Македонија во однос на остварување на нивните права и обврски кои произлегуваат од работниот однос“, соопшти ССМ.
Неусогласувањето на платите со новата минималната плата е причина и за штрајкот во јавниот секот кој трае веќе трет месец, а според ССМ ова е прв пат во историјата на Македонија генерален штрајк во цел сектор кој трае толку долго, а Владата да одбива да разговара со претставниците на работниците.
Од синдикатот велат дека и Владата исто како и приватниот сектор е должна да постапи по законот и да ги усогласи платите.
„Дотолку повеќе што во приватниот сектор особено каде што ССМ има синдикати, приватните работодавачи постапувајќи по законот ги усогласија колективните договори и ги зголемија платите на своите вработени, а истото го сторија и општините, градот Скопје и јавните претпријатија основани од општините и Градот Скопје, а останаа уште оние работници за кои е надлежна Владата како вработените во дел во министерствата и јавните претпријатија за кои е основач Владата“, стои во соопштението.
Дополнително, со поднесувањето на оваа тужба, ССМ ќе ги искористи и сите други достапни механизми и ќе поднесе соодветни тужби и пријави пред меѓународните институции за што веќе добиваме помош и поддршка од Европската конфедерација на синдикатите.
