Македонија

Каков дом може да се купи во Скопје за повеќе од 500.000 евра?

4 септември 2022, 10:04

Водно, Бардовци, Злокуќани меѓу најелитните населби

Каков дом може да се купи во Скопје за повеќе од 500.000 евра?

Пазар 3

Владимир Николоски

Во период кога цените на станбените површини во Скопје уриваат рекорди и кога квадрат во центарот на градот достигнува и до 2.000 евра, се зголемува бројот на граѓани кои размислуваат за купување куќи во некои од елитните населби или предградија. Од друга страна, во огласите за недвижности се зголемува понудата на луксузни куќи и резиденции чии цени се движат од 500.000 евра до над 1.000.000 евра.

Во нашата земја се ретки оние што можат да си дозволат да одвојат поголема сума пари за дом од соништата, но понекогаш добрата математика и кредитирањето можат да помогнат при одлуката дали се исплати ваква инвестиција, посебно ако станува збор за заедничко живеење на две или три семејства. Затоа, разгледавме какви куќи, со колкава квадратура и со какви дополнителни вредности се нудат во моментов на пазарот по цени повисоки од половина милион евра.

На пазарот се нуди на продажба куќа во населба Трнодол во Скопје. Куќата има 4 одделни стана и тоа два со површина од 200 квадрати, и уште два со површина од 100 и од 61 квадрат во сутерен со винотека. Куќата има и подземна гаража од 200 квадрати и двор од 210 квадрати. Во огласот се вели дека има имотен лист и е спремна за вселување. Продавачот потенцира дека куќата има надворешен панорамски лифт, како и дека е изработена од најквалитетни материјали од европско потекло. Цената е 700.000 евра.

За една од најелитните скопски населби важи Злокуќани. Таму се нуди на продажба куќа од 500 квадрати и двор 1.400 квадрати. Во дворот има базен, гаража за четири возила, со три влеза и излеза, пет купатила, едно вц, две дневни соби, на секој спрат по една, две кујни и четири спални. Цената е 700.000 евра.

Во Злокуќани се продава и луксузна резиденцијална со површина од 378 квадрати и двор од околу 3.000 квадрати. Куќата има дневна соба со трпезарија од 150 квадрати, 2 спални, две детски соби,4 тоалета, сауна, гаража за 3 возила и паркинг за 6 возила во дворот. Исто така, има и стражарска куќичка.

Имотите на Водно се уште важат за најпривлечни, но и најскапи на пазарот. Во овој реон се продава куќа од 500 квадрати и двор 1.100 квадрати. Куќата се наоѓа веднаш до резиденцијата на претседателот на државата, има 4 спални, 2 гостински соби,големи пространи дневни салони на двата ката,4 тоалети, 2 тераси,4 паркинг места надворешни и гаража од 25м2, клима уред во секоја просторија и пелетен систем на греење. Куќата се продава за 1,4 милиони евра.