Израелци со голем интерес за соларни паркови во Македонија

Се зголемува интересот кај компании од Израел да инвестираат во изградба на капацитети за производство на струја од фотоволтаици или таканаречени соларни паркови. Тие купуваат македонски компании кои веќе имаат купено земјиште со намена изградба на соларни паркови и ги имаат започнато процедурите за добивање дозволи за работа. 

Таков е примерот на израелската компанија „Ел-мор Електрични Инсталации и Сервиси 1986“ (Ел-мор) која веќе ја известила Комисијата за заштита на конкуренцијата дека стекнува самостојна контрола над македонското друштво за производство на енергија „Сушево 1“ преку купопродажба на удели. 

„Ел-мор“ е компанија која спроведува проекти за имплементација на енергија, електрична енергија и климатизација и нуди услуги во неколку области како што се електрични централи, обновлива и соларна енергија, индустрија, телекомуникации, комерцијални и јавни згради, воени и одбранбени објекти, електрична и телекомуникациска инфраструктура и улично осветлување. „Сушево 1“,пак, е ново основано друштво за посебна намена за развој на фотоволтаични проекти со капацитет од околу 100 MW лоцирано во областа на Штип, катастарска општина Доброшани.

„Блумберг Адриа“ веќе пишуваше дека уште една голема израелска компанија инвестира во изградба на соларни паркови кај Пробиштип. Станува збор за израелскиот оператор со трговски центри „Big shopping centers“ (Биг шопинг центри) кој презеде проект за изградба на фотоволтаичен парк кај Пробиштип вреден 53 милиони евра. Преку својата компанија од Унгарија „Биг енерџи холдингс Кфт“, Израелците ги купуваат македонските фирми „Бака енерџи“ и  „Чашица солар“, чии проекти за изградба на фотоволтаични централи се веќе во напредна фаза.

„Биг шопинг центри“ е холдинг на компании, претежно во дејноста на ндвижности со активности во САД, Израел, Србија, Црна Гора и Франција. Тој гради и инвестира во трговски центри и молови, деловни згради и логистички центри низ целиот свет, вклучително 30 центри во Израел, 10 во САД, 9 во Србија и многу други се воизградба. Холдингот котира на берзата во Тел Авив и претставува една од најголемите компании за недвижности во Израел со удел од повеќе од три милијарди евра на тамошниот пазар. Во изминатите години, холдингот преку нивната унгарска компанија „Биг енерџи холдингс Кфт“ почна да инвестира во секторот на електрична енергија преку купување на удели односно цели друштва и преку развивање сопствени проекти.

„Бака енерџи“ и „Чашица солар“ се македонски компании кои се стекнале со земјиште за изградба на фотоволтаични централи, но проектите се уште се во фаза на развој и обезбедување на сите потребни лиценци. Двете компании немаат започнато со производство на електрична енергија.

Во моментов нема коментари за веста. Биди прв да коментира...

Остави коментар