Пазарот на обврзници, потресен од стравувањата за забрзување на инфлацијата, ќе биде првиот голем тест за новиот претседател на Федералните резерви Кевин Ворш, оценува шефицата на истражувања во „Сосиете Женерал Америкас“ (Societe Generale Americas).
Ворш, кого американскиот претседател Доналд Трамп го избра за наследник на Џером Пауел, се соочува со сè повеќе знаци дека скокот на цените на енергенсите предизвикан од војната со Иран ги засилува инфлациските притисоци во САД, изјави Субадра Раџапа во петокот за емисијата „Надзор“ (Surveillance) на „Блумберг ТВ“.
Тоа дополнително ќе ја усложни неговата можност да ги испорача пониските каматни стапки што ги поддржува и што ги бара Трамп.
„Почнувам малку да се загрижувам бидејќи приносите на обврзниците навистина изгледаат како да излегуваат од контрола“, рече Раџапа. „Мислам дека навистина треба внимателно да ги следиме сигналите што доаѓаат од пазарот на обврзници.“
Загубите на американските државни обврзници се продлабочија пред викендот, дополнително поттикнати од растот на Брент над 109 долари за барел во текот на денот, откако инфлацијата на малопродажно и големопродажно ниво ги надмина очекувањата на повеќето аналитичари.
Приносот на двегодишните американски обврзници во петокот се искачи над 4,08 отсто, највисоко ниво од март 2025 година, додека приносот на 30-годишните обврзници достигна највисоко ниво во речиси една година.
Извештајот објавен во средата покажа дека трошоците на производителите растат со најбрзо темпо од 2022 година, што ги поттикна инвеститорите да ги зголемат облозите дека следниот потег на Фед ќе биде ново зголемување на каматните стапки. Пазарите сега проценуваат дека има речиси две третини шанси Фед да ги зголеми трошоците за задолжување до декември, покажуваат податоците собрани од Блумберг.
Само на 27 февруари, ден пред нападот на САД и Израел врз Иран, инвеститорите очекуваа повеќе од две намалувања на каматните стапки годинава.
Овој пресврт го покажува предизвикот со кој се соочува Ворш, кој во средата беше потврден за претседател на Фед и првпат ќе претседава со состанокот на Федералниот комитет за отворен пазар на 16 и 17 јуни. Последниот ден на Пауел како претседател е во петок, иако тој планира да остане гувернер до 2028 година.
„Она што ќе биде навистина многу важно за Кевин Ворш е да ги држи инфлациските очекувања под контрола“, рече Раџапа.
„Кога инфлациските очекувања почнуваат да излегуваат од контрола, тогаш тој има сериозен проблем. Многу е важно Фед да го смени својот пристап од олеснување кон неутрален став и да биде подготвен да реагира ако биде потребно.“
.webp){kind=icon}
