.webp){kind=icon}
Меѓународниот монетарен фонд (ММФ) соопшти дека изгледите за светската економија сега се попесимистички од она што го прогнозира минатиот месец, бидејќи се остваруваат надолните ризици од ефектите од руската војна во Украина и постојаната инфлација.
Во проекциите од минатиот месец, (World Economic Outlook - WEO) фондот со седиште во Вашингтон ја намали прогнозата за глобалниот раст следната година на 2,7 отсто, од 2,9 отсто посочени во јули и 3,8 отсто во јануари, додавајќи дека има 25 отсто веројатност оти растот ќе забави на помалку од 2 процента.
„Во многу земји веројатно е потребно континуирано фискално и монетарно затегнување за да се намали инфлацијата и да се решат ранливостите од долгот - очекуваме дополнително затегнување во многу економии на Г20 во месеците што следуваат“, посочи Тригви Гудмундсон, економист во одделот за истражување на ММФ.
„Овие акции ќе продолжат да влијаат на економската активност, особено во секторите чувствителни на каматите, како што е домувањето“, додаде тој во објава во пресрет на собирот на лидерите на Г20 во Бали, Индонезија, следната недела.
Минатиот месец, ММФ пресмета дека околу една третина од светската економија ќе има најмалку два последователни квартала на контракција оваа и следната година и дека изгубеното производство до 2026 година ќе биде четири илјади милијарди долари.
