Мирната недела пред прославата на Божиќ според грегоријанскиот календар беше потресена од шокантниот потег на Банката на Јапонија (BoJ).
Јенот го забележа најголемиот еднодневен подем од 1998 година во вторникот и останува покачен.
Банката на Јапонија е голем играч во централното банкарство и јенот е трета најважна валута во светот, зад доларот и еврото. Неочекуваната промена на политиката одекна далеку надвор од Јапонија, при што последиците допреа сè, од фјучерсите на американскиот берзански индекс до австралискиот долар и златото.
Каква врска има јапонската централна банка со вашите финансии? Ако сите говори на лидерите на централните банки и контролата на кривата на принос ве оставија малку збунети, ние сме тука да помогнеме.
Што се случи?
Јапонскиот гувернер Харухико Курода ги вџаши сите со проширување на опсегот на тргување на приносите на десетгодишните обврзници (тој не за џабе е познат како господар на изненадувањата). Ова е важно бидејќи инвеститорите го третираат овој потег како најава за крај на најниските трошоци за задолжување - нешто со што Јапонија заглави и покрај постојаниот бран на зголемувања на каматните стапки од другите централни банки во текот на годинава.
Харухико Курода / Bloomberg Mercury
Масамичи Адачи, главен јапонски економист во „УБС секјуритис“ (UBS Securities) и поранешен функционер на BоJ, рече дека промената „ја отвора вратата“ за зголемување на стапките во 2023 година под новиот гувернер (Курода треба да се повлече во април).
Зошто е ова важно?
Јапонија е најголемиот кредитор во светот, а заострувањето на домашните финансиски услови може да резултира со бран на капитал што се враќа дома. Тоа се заканува да ги намали цените на средствата и да ги зголеми глобалните трошоци за задолжување во време кога економските изгледи низ светот се влошуваат.
Јапонските менаџери со пари имаат повеќе од три илјади милијарди долари инвестирани во акции и обврзници во странство, а повеќе од половина од нив се чуваат во САД. Други земји, како Холандија, Австралија и Франција, се исто така ранливи на можна репатријација на јапонскиот фонд, според податоците на „Блумберг“.
Што значи тоа за вашиот долг?
Големата загриженост за остатокот од светот е дека акцијата на BоJ би можела да го олабави последниот преостанат дел на глобалните приноси на обврзниците и да предизвика распродажба на средствата во долари во корист на јенот. Во суштина, посветеноста на BоJ да ги одбрани своите десетгодишни граници на принос послужи како сидро, кое индиректно помага да се одржат ниските трошоци за задолжување низ целиот свет.
Позајмувачите се соочуваат со притисок ако заемодавците ги зголемат стапките на заемите, но тоа е плус за штедачите доколку банките почнат да плаќаат поголема камата на депозитите.
Што значи ова за туристите?
Посетата на Јапонија оваа зима можеби и нема да биде многу добра зделка. Јенот остро се зголеми во однос на доларот по одлуката и се задржа на добивка. Инвеститорите сега се обложуваат дека јенот може да порасне уште за 10 отсто.
Дали ова ќе има некакво влијание врз глобалната економија додека се наѕира рецесија?
Курода заминува од должноста во април, така што одлуката од вторникот ги зголемува очекувањата дека неговата смена ќе доведе до дополнително монетарно затегнување, а секој погрешен чекор на новиот гувернер може да предизвика превирања на глобалниот пазар.
Ако трајното затегнување доведе до тоа јапонските инвеститори, како што се банките и пензиските фондови, да ги намалат инвестициите во странство, вклучувајќи ги и глобалните акции, тоа дури може да предизвика зараза меѓу средствата, вклучувајќи ги и оние на пазарите во развој.
.webp){kind=icon}