Американската економија губи 26,6 милијарди долари секоја година поради вработените жени кои се справуваат со симптоми на менопауза. Се работи за изгубени трошоци за продуктивност и здравствена заштита.
Студијата на клиниката Мајо, која опфати одговори од 4.400 жени на возраст меѓу 45 и 60 години, покажува дека речиси 11 отсто од жените пропуштиле работа во претходните 12 месеци поради симптоми како што се топли бранови или нарушувања на спиењето.
Годишниот трошок за изгубените работни денови е 1,8 милијарди долари, а тоа не вклучува намалени работни часови, губење на работа или предвремено пензионирање. Најмалку 13 отсто од анкетираните жени изјавиле дека се соочиле со една од тие три ситуации поради симптоми на менопауза.
Директните трошоци за здравствена заштита поради проблеми со менопаузата изнесуваат 24,8 милијарди долари.
Во една студија од 2021 година, беше објавено дека 99 проценти од вработените жени немаат никакви придобивки поради тешкотиите во справувањето со менопаузата.
Според клиниката Мајо, неопходно е да се подобри медицинскиот третман за жените во менопауза, но и да се создаде работна средина која е повеќе склона да го разбере проблемот и да обезбеди поддршка во овој период од животот на жената.
Жените на возраст меѓу 45 и 54 години сочинуваат 20 отсто од вработените жени во САД. Бојата на кожата е исто така фактор, бидејќи црните жени имаат речиси три пати поголеми шанси да пријават проблеми поврзани со работата за време на менопаузата отколку белите жени.
„Многу средовечни жени се наоѓаат во ситуации кога доживуваат успех во кариерата или преземаат лидерски улоги. Таквите жени може да одлучат да се откажат од својата работа или од своите лидерски позиции, а тоа може да биде една од непризнаените причини зошто нема многу жени на високи лидерски позиции“, се наведува во студијата.
Згора на тоа, во извештајот на консултантската фирма за менаџмент „Меккинси“ (McKinsey) минатиот октомври беше наведено дека за секоја унапредена жена на ниво на директор, две директорки одлучуваат да ја напуштат компанијата.
Исто така, според друг извештај, речиси една третина од Американките на возраст меѓу 40 и 55 години велат дека размислуваат да работат со скратено работно време, додека 22 отсто велат дека размислуваат за предвремено пензионирање.
Во една студија спроведена во Обединетото Кралство, 18 отсто од жените во менопауза размислуваат да ја напуштат својата работа.
.webp){kind=icon}
