Договорот за ограничување на долгот што го постигнаа претседателот Џо Бајден и претседателот Кевин Мекарти треба да биде ставен на гласање во Претставничкиот дом во текот на денешниот ден, откако е отстранета клучната процедурална пречка. Со тоа се отвора голема можност на само неколку дена да се избегне неисполнување на обврските на САД.
Законското решение за привремено суспендирање на максималната граница за задолжување на САД и ограничувањето на федералните расходи беше подготвено од Комитетот на Претставничкиот дом вчера доцна вечерта, испраќајќи го на гласање за последно усвојување од домот. Конгресот се бори да ја усвои мерката пред 5 јуни, датумот за кога министерката за финансии Џенет Јелен предупреди дека САД ризикуваат неплаќање.
Сепак, лидерите во двете партии се соочуваат со негодување од дел од членовите што се противат на отстапките направени од преговарачите во компромисот објавен викендов.
Американските државни обврзници се малку променети во рамките на азиското тргување утрово. Приносите од нив претходно се намалија, бидејќи трговците го оценуваа веројатното влијание на договорот за ограничување на долгот врз идните политички одлуки на ФЕД.
Предлог-законот ќе го постави курсот за федералните трошоци за следните две години и ќе го суспендира плафонот на долгот до 1 јануари 2025 година. Бајден и Мекарти рекоа дека мерката ќе помине и секој од нив посвети големо време во лобирање кај членовите на нивните партии. Во замена за гласовите на републиканците за суспензијата, демократите се согласија да ги ограничат федералните трошоци во следните две години. Според толкувањето на ограничувањата во Белата куќа, ќе се намалат трошоците за најмалку една илјада милијарди долари во текот на една деценија.
Економистите на „Блумберг економикс“ (Bloomberg Economics), Ана Вонг и Маева Казин, вчера напишаа дека двегодишните ограничувања на трошоците наведени во договорот „ќе ѝ нанесат дополнителен краткорочен удар на економијата, која веќе е ранлива на рецесија. Сепак, тие едвај ќе ја нарушат неодржливата среднорочна траекторија на американскиот федерален долг, за кој проценуваме дека сè уште е на пат да се зголеми од 97 проценти од БДП во 2022 година на повеќе од 130 отсто од БДП до 2033 година“.
Лидерите на двете клучни партии, републиканците и демократите, изразија оптимизам дека Домот брзо ќе го усвои законот. Усвојувањето во Домот денеска е од клучно значење за донесување на законот во Сенатот пред крајниот рок, 5 јуни.
.webp){kind=icon}
