Турција го зголеми данокот на гориво за 200 проценти

Турција денеска ги зголеми даноците за гориво за речиси 200 проценти, потег што ќе ги зголеми инфлаторните притисоци и дополнително ќе ги оптоварува буџетите на домаќинствата. Новите специјални даноци за потрошувачка на различни видови гориво, вклучувајќи ги бензинот и дизелот беа објавени во Службениот весник.

Зголемувањето ќе помогне да се задоволат финансиските потреби кои произлегуваат од смртоносните земјотреси во февруари и ќе му овозможи на Министерството за финансии да одржува силни готовински резерви, се вели во соопштението на Министерството. Земјотресите предизвикаа штета од повеќе од 100 милијарди долари, процени Владата.

Но, одлуката, исто така се очекува да ја стави инфлацијата, која моментално е на годишно ниво од 38 проценти, на повисока траекторија. За тоа ќе допринесат и ослабената лира и плановите на Владата да ги зголеми трошоците за да ги исполни предизборните ветувања.

Новиот предлог-закон се обидува да надомести дел од товарот на фискалната страна со укинување на корпоративните даноци и удвојување на данокот за моторни возила. Веќе се воведени даночни зголемувања за различни производи за широка потрошувачка.

Претседателот Реџеп Таип Ердоган, кој обезбеди уште еден петгодишен мандат на гласањето во мај, вети привремено зголемување на минималната плата и зголемување на пензиите. Лирата изгуби околу една четвртина од својата вредност во однос на доларот од одржувањето на изборите досега.

Ердоган донесе нови чувари на економијата во обид да го врати кредибилитетот. Поранешните банкари од „Волстрит“, Мехмет Шимшек и Хафизе Гаје Еркан беа именувани за министер за финансии и за гувернер на централната банка.

Неконвенционалниот експеримент кој ја одржуваше референтната каматна стапка вештачки ниска и покрај високата инфлација пред гласањето, ја поттикна инфлацијата да надмине 85 проценти минатата година и ги исцрпи девизните резерви на земјата додека креаторите на политиките се обидуваа да ја одржат лирата стабилна.

Новото економско дуо ветува стабилност на цените. Централната банка ја зголеми својата референтна каматна стапка прв пат по повеќе од две години од 8,5 на 15 проценти и се очекува да продолжи со овој, како што го опишува „постепен“ циклус на затегање овој месец.

Во моментов нема коментари за веста. Биди прв да коментира...

Остави коментар