Лековите за слабеење може да им заштедат милиони на авиокомпаниите

Авиокомпаниите и производителите на авиони, кои се опседнати со намалување на потрошувачката на млазно гориво и со постојано изнаоѓање нови начини за намалување на тежината на авионите можеби имаат нови сојузници во „Оземпик“ и други слични лекови за слабеење.

„Јунајтед Ерлајнс Холдингс“ (United Airlines Holdings Inc.) би заштедила 80 милиони долари годишно ако просечната тежина на патниците падне за 10 фунти, процени вчера во извештај Шејла Кахјаоглу, финансиски аналитичар на „Џефирајс“ (Jefferies). Нејзината работа беше дел од пошироката анализа на компанијата за ентузијазмот на јавноста за лекот и потенцијалните корисници на неговата употреба.

Може да има повеќе од 100 милијарди долари глобален пазар за такви лекови, при што продажбата брзо ќе се искачи до крајот на деценијата, се заклучува во извештајот. „Оземпик“ е направен од „Ново Нордиск“ (Novo Nordisk A/S).

Тежината е голема грижа за авиокомпаниите бидејќи колку повеќе тежи авионот, толку повеќе гориво согорува. Горивото и работната сила се двата најголеми трошоци за превозниците, при што горивото учествува со околу 25 проценти. Со текот на годините авиокомпаниите користеа различни методи за намалување на тежината на летовите, како што се отстранување на списанија и префрлање на садови, прибор и колички за пијалоци со помала тежина.

Ако просечниот патник изгуби 10 фунти, тоа би намалило 1.790 фунти од секој лет на „Јунајтед“, што значи заштеда од 27,6 милиони галони годишно, проценува аналитичарот. Со просечна цена на горивото во 2023 година од 2,89 долари за галон, „Јунајтед“ би заштедила 80 милиони долари годишно. Тоа е еднакво на 20 центи заработка по акција, или два проценти од проценетата заработка, која според „Џефирајс“ за цела година би била 9,50 долари по акција, рече таа.

„Оваа придобивка треба да ја препознаат и другите авиокомпании“, напиша Кахјаоглу.

Центрите за контрола и превенција на болести велат дека секој трет возрасен и секое петто дете се дебели или имаат индекс на телесна маса од 30 или повисок за возрасни. И уделот на светското население за кое се смета дека има прекумерна тежина се очекува да достигне 41,5 проценти оваа година, од 36,4 проценти во 2013 година, според извештајот на компанијата.

Меѓу другите индустрии за кои се гледа можност да имаат корист од подемот на лековите за губење на тежината се фармацијата, облеката (особено атлетска облека) и козметика, се вели во извештајот на компанијата. Негативни ефекти се можни кај рестораните и некои производители на храна и пијалоци доколку потрошувачите се префрлат на поздрава исхрана или престанат да купуваат некои производи. Високата цена на лековите може да ги намали трошоците за работи како мебел или патување, се вели во извештајот.

Цените на авионското гориво во Њујорк се искачија за 39 проценти или 89 центи за галон, во текот на изминатите три месеци, достигнувајќи 3,19 долари во петокот. Секое зголемување од 10 центи по галон на авионско гориво ги чини авиокомпаниите 2 милијарди долари годишно, според проценките за 2023 година од Бирото за транспортна статистика и авиокомпании за Америка.

Во моментов нема коментари за веста. Биди прв да коментира...

Остави коментар