Аргентина го девалвира пезосот за 54 отсто и најави масовни кратења на трошоците за да го елиминира својот примарен фискален дефицит следната година како прв чекор во програмата за шок-терапија на претседателот Хавиер Милеи.
„Новата администрација го ослабна официјалниот девизен курс на 800 пезоси за долар“, рече министерот за економија Луис Капуто во телевизиско обраќање по затворањето на локалните пазари во вторникот. Пред потегот беше 366,5 за долар. Централната банка отсега ќе цели на месечна девалвација од 2 отсто.
Потезите беа поздравени од Меѓународниот монетарен фонд. Централната банка в среда треба да објави нови монетарни мерки.
Луис Капуто
Bloomberg
„Нема повеќе пари“, рече повеќепати Капуто во снименото видео, додавајќи дека Аргентина треба да ја реши својата „зависност“ од фискалните дефицити.
Владата ќе ги намали трошоците на 2,9 отсто од бруто-домашниот производ, во радикално фискално приспособување, според висок економски функционер.
Намалувањето на субвенциите за енергија ќе заштеди 0,5 отсто од БДП, додека намалувањето на субвенциите за транспорт ќе заштеди 0,2 отсто, според процените на владата. Администрацијата очекува намалувањето на социјалното осигурување и на пензиите да заштеди дополнителни 0,4 отсто од БДП. „Владата планира да му стави крај на индексирањето на исплатите на пензиите“, рече претставникот.
Министерството за финансии очекува и даночните приходи да пораснат за 2,2 отсто следната година.
Меѓу другите најавени мерки се и преполовување на бројот на министерствата, намалување на трансферите во провинциите и суспендирање државни работни места. „Во исто време, Аргентина ќе зајакне одредени програми за социјална заштита“, рече Капуто.
ММФ ги пофали „храбрите првични акции“ на новата влада веднаш по најавата на Капуто. „Нивната решителна имплементација ќе помогне да се стабилизира економијата и да се постави основата за поодржлив раст предводен од приватниот сектор“, наведе портпаролката Џули Козак во изјавата.
Драматичните први чекори следуваат по мрачниот говор на инаугурацијата во неделата, кога Милеи предупреди дека Аргентинците ќе мора да трпат месеци на болка додека тој работи на извлекување на земјата од економската криза наследена од неговиот претходник. „Инфлацијата веќе е повеќе од 140 отсто годишно, а цените се очекува да скокнат помеѓу 20 и 40 отсто во месеците што доаѓаат“, рече претседателот.
.webp){kind=icon}