Потпретседателот на „Блекрок“ (BlackRock Inc.) Филип Хилдебранд изјави дека облозите на инвеститорите за намалување на каматните стапки во САД би можеле да испаднат претерани откако инфлацијата се покажа како поотпорна од очекуваното.
Поранешниот претседател на Швајцарската национална банка вели дека брзото забавување на растот на потрошувачките цени им дава на финансиските пазари лажно чувство на сигурност во врска со основните притисоци.
„Инфлацијата на стоките ќе продолжи да се намалува прилично брзо--во моментов сме во негативни бројки--и тоа во основа прилично драматично ги намалува бројките на вкупната инфлација“, рече тој во интервју за телевизијата „Блумберг“ на Светскиот економски форум во Давос. „Како резултат на тоа, пазарите сега проценуваат дека е веројатно намалувањето на стапките во САД“.
Филип Хилдебранд, потпретседател на „Блекрок“ (BlackRock Inc.)/Bloomberg Mercury
Пазарите на пари се обложуваат на шест намалувања од четвртина поен од страна на Федералните резерви оваа година, а за седмо намалување има над 50 отсто шанси, покажуваат прогнозите поврзани со датумите за состаноци на креаторите на политиката во САД. Првото вакво намалување се очекува до мај.
Хилдебранд предупредува дека инвеститорите наскоро ќе видат дека ваквата перспектива е погрешна.
„Малку сум загрижен што некако сметаме дека сме блиску до совршенство, како да сме блиску до совршено меко приземјување каде што инфлацијата повеќе не е проблем“, рече тој. „Во одреден момент ќе сфатиме дека не е толку лесно да се стабилизираме на целната инфлација од два отсто што ја бараат централните банки, така што оптимизмот за каматните стапки особено во САД веројатно е претерана“.
Хилдебранд конкретно предупреди дека зголемувањето на цените на услугите сè уште преовладува и дека платите рапидно растат. Тоа ќе значи ограничување на можноста на креаторите на политиките да им помогнат на домаќинствата и бизнисите во услови на анемичен раст.
„Ќе има слабост во економијата, нема сомнеж за тоа, но мислам дека централните банки ќе откријат, особено во САД, дека нема да имаат толку простор за кратења како што се проценува во моментов“.
Изборите во САД и Доналд Трамп
Доналд Трамп е илјадници километри далеку од алпскиот швајцарски град Давос, но говорите за негово можно враќање во Белата куќа се на усните на сите учесници на годишниот собир на глобалната елита.
Денеска на температури под нулата во Ајова, во прелиминарниот натпревар на Републиканската партија за изборите во 2024 година, Трамп е подготвен да го зацврсти својот статус како републикански фаворит. Неговата огромна предност пред неговите ривали се чини дека е несовладлива, а анкетите покажуваат дека Трамп и американскиот претседател Џо Бајден се во мртва трка.
Последен пат виден како се меша со толпата во Давос во 2020 година, кога направи драматичен влез со слетување со хеликоптери, Трамп е последниот американски лидер што се појави на Светскиот економски форум, но останува популарна тема на разговор меѓу присутните меѓу кои има извршни директори, финансиери и креатори на политики.
„Знаете, бевме таму и претходно, го поминавме тоа, па ќе видиме што значи тоа“, рече Хилдебранд во интервјуто за телевизијата „Блумберг“. „Секако од европска перспектива, од еден вид глобалистичка перспектива, тоа секако е причина за голема загриженост“.
Поранешниот претседател на швајцарската национална банка ја сподели оценката на претседателката на Европската централна банка, Кристин Лагард, која минатата недела на чист јазик некарактеристичен за централен банкар рече дека уште еден мандат на Трамп ќе претставува јасна закана.
Поранешниот американски потпретседател Ал Гор, се разбира, не е непознат за политичките шокови, бидејќи тој беше на работ да стане претседател пред речиси четвртина век
Ал Гор, поранешен американски потпретседател/Bloomberg Mercury
„Поминав низ процесот, водев четири национални кампањи низ годините и го видов тоа од таа перспектива. Сум видел многу изненадувања низ годините. Нешто ми кажува дека ова може да биде година на значајни изненадувања. Се надевам дека е така бидејќи не сакам да го видам повторно да се кандидира и да биде реизбран“, изјави Гор за ТВ Блумберг
Тој дури издаде предупредување да не се преувеличува важноста на гласањето во Ајова.
„Не сум сигурен дека е толку значајно како што некои веруваат, рече тој. „Имаше толку многу примери – последен пат беше во 2016 година кога Тед Круз победи на претседателските избори во Ајова, и тогаш тоа воопшто не беше важно. Видовме како други победуваат на страната на републиканците страни во Ајова, а потоа исчезнуваат“, вели Гор.
Турција го прескокна Давос поради војната во Појасот Газа
Турскиот претседател Реџеп Таип Ердоган побара од официјалните претставници на неговата земја да го прескокнат Светскиот економски форум во Давос оваа недела поради ставот на неговите организатори за војната на Израел против Хамас, велат извори запознаени со ова прашање.
Министерот за финансии Мехмет Шимшек планираше да присуствува на годишниот собир на политичките и деловните лидери додека Ердоган – кој го критикуваше однесувањето на Израел во војната во Газа – не го спречи во намерата да оди, велат изворите кои инсистираат на анонимност поради чувствителноста на прашањето.
Мехмет Шимшек, министер за финансии на Турција/Bloomberg Mercury
Одлуката на Ердоган да ги повлече своите највисоки функционери од самитот ги усложнува напорите на Турција да се поврзе со глобалните инвеститори кои си заминаа од земјата порадни неконвенционалните политики.
Неприсуството во Давос следи по уште една промена на плановите на Шимшек во изминатите неколку дена. Министерот, назначен во јуни како дел од реконструкцијата на владата на Ердоган, требаше да присуствува на состанокот со инвеститорите во Њујорк организиран од централната банка минатата недела, но наместо тоа се приклучи преку видео врска.
Турција – за разлика од САД и Европската унија – не го смета Хамас за терористичка организација.
Ова не е првпат Ердоган да го искористи Давос за да заземе политички став во врска со израелско-палестинскиот конфликт.
Во 2009 година, турскиот лидер си замина за време на дискусијата со тогашниот израелски претседател Шимон Перес за неговата воена операција во Газа претходната година и вети дека нема да се врати.
Ердоган никогаш не се врати, иако турските власти повторно почнаа да доаѓаат по неколку години.
Израелската офанзива во Газа започна откако Хамас нападна од Појасот Газа на 7 октомври. Поголемиот дел од Појасот Газа оттогаш е претворен во урнатини и повеќе од 24.000 луѓе се убиени, според тамошните здравствени власти.
Војната влегува во третата година, Зеленски бара приватни инвеститори
Володимир Зеленски планира да се сретне со Џејми Димон од ЏП Морган оваа недела на Светскиот економски форум. Тој, како претседател на Украина се обидува да ги наполни касите за да се бори против Русија, велат извори запознаени со ова прашање.
Повеќе од 100 милијарди долари важна помош за Киев е замрзната во Вашингтон и Брисел, бидејќи сојузниците се изморени од скапите воени напори со повеќемесечната контраофанзива на Украина која не успеа да донесе напредок на бојното поле. Откако борбите влегуваат во третата година, повиците на Украина за помош се засенети на светската сцена поради конфликтот меѓу Израел и Хамас што започна во октомври.
Володимир Зеленски, претседател на Украина/МИА
ЏП Морган го советуваше Зеленски да привлече приватен капитал за различни проекти за реконструкција. Во септември, Мери Ердоес, шефот на управувањето со средства и богатство на ЏП Морган, договори Зеленски да се сретне со американските финансиски лидери, вклучително и Кен Грифин од Цитадел и Џон Греј од „Блекстоун“ (Blackstone Inc.), за да разговараат за изнаоѓање начини приватниот сектор да помогне во обновата на неговата земја.
Покрај средбата со извршниот директор на ЏП Морган, кој е веројатно најмоќната личност во американското банкарство, украинскиот претседател планира да се види и со швајцарската претседателка Виола Амхерд и да и се обрати на јавноста на годишниот состанок во Давос, Швајцарија.
Претходно во неделата, на состанокот на советниците за национална безбедност за украинската мировна формула од 10 точки присуствуваа 83 земји, вклучително и десетици од глобалниот југ кои досега не сакаа да застанат на страната на Киев во неговата борба против Русија. Украина сега има за цел да организира самит на ниво на лидери, но за состанокот не е одреден датум или земја домаќин.
Автори: Francine Lacqua, Craig Stirling, Firat Kozok, Alessandro Speciale, Sridhar Natarajan
.webp){kind=icon}
