Очекувањата на пазарот дека каматните стапки ќе бидат брзо намалени се избрзани бидејќи борбата против инфлацијата сè уште не е завршена, изјави претставничката на Меѓународниот монетарен фонд (ММФ), Гита Гопинат. Говорејќи на Светскиот економски форум во Давос, извршната директорка на фондот рече дека по наглото зголемување на трошоците за задолжување во последните две години, работата сè уште не е завршена бидејќи пазарите на трудот остануваат силни на двете страни на Атлантикот.
„Пазарите очекуваат централните банки доста агресивно да ги намалат каматните стапки - мислам дека е премногу рано да се донесе таков заклучок“, рече таа. „Треба да очекуваме намалување на каматните стапки годинава, но врз основа на податоците што ги имаме, очекуваме дека тоа е поверојатно да се случи во втората половина од годината“.
Нејзината изјава ги повторува оние на глобалните монетарни функционери што им пркосат на очекувањата на инвеститорите за агресивно намалување на трошоците за задолжување. Гопинат истакна дека економиите добро се држат и покрај тешките услови, што ги намалува шансите за длабока рецесија.
„Имаме домаќинства и корпорации со посилни биланси и ги видовме ефектите, но видовме и отпорност; пазарите на трудот забавуваат, но со многу побавно темпо“, рече таа.
На долг рок, Гопинат вели дека каматните стапки во просек ќе бидат повисоки отколку во периодот по глобалната финансиска криза, кога централните банки се обидоа да ја поттикнат инфлацијата.
Говорејќи на истиот панел, членот на Одборот на гувернери на Европската централна банка, Франсоа Вилерој де Галхау, рече дека економските трансформации, вклучувајќи ја и борбата против климатските промени, ќе значат повисоки стапки на долг рок. Тој истакна дека стапките на ЕЦБ би можеле да бидат на „нова нормала“ од околу два отсто во просек.
Вилерој одби да прецизира точно кога ЕЦБ ќе ги намали трошоците за позајмување, откако во последните недели велеше дека првите намалувања на трошоците за задолжување треба да се случат годинава.
„Рано е да се прогласи победа, целосно се согласувам со Гита и работата сè уште не е завршена“, изјави Вилерој. Стапките не треба да бидат повисоки отколку што се сега и со исклучување на какви било големи изненадувања - во однос на Блискиот Исток - нашиот следен потег годинава веројатно ќе биде намалување.
Тој исто така се согласи со Гопинат за изгледите за економскиот раст.
„Она што можеме да го видиме на двете страни на Атлантикот е пад на инфлацијата, при што се избегнува рецесија“, рече Вилерој.
.webp){kind=icon}
