Фабричката активност во Кина ги надмина очекувањата во март, зголемувајќи го оптимизмот за способноста на земјата да ја постигне својата амбициозна цел за раст од околу 5 отсто годинава.
Индексот за набавки во производството (PMI) на „Чајшин“ (Caixin) се искачи на 51,1 во понеделникот - над стапката од 50, што укажува на раст веќе петти месец, најдолга низа во повеќе од две години.
Владините податоци објавени во неделата покажаа дека производствениот PMI во март ја прекина петмесечната контракција за да се искачи на највисокото ниво во една година. И двeте вредности ги надминаа очекувањата на пазарот, додавајќи на аргументите дека индустрискиот сектор во земјата гради импулс за економско закрепнување.
Bloomberg
Кинескиот индекс CSI 300 се зголеми за 1,5 отсто, најмногу за еден месец, во понеделникот. Тргувањето со акции во Хонгконг беше затворено поради државен празник. Приносот на 10-годишните државни обврзници се зголеми за еден базичен поен, на 2,31 отсто, заклучно со 11:58 часот во Шангај.
Жаклин Ронг, главна економистка за Кина во „Парибас“ (BNP Paribas SA), рече дека дури и да се исклучат сезонските фактори, индустрискиот замав можеби ќе се зацврсти во март.
Одново разгорени надежи
Извозот скокна во периодот јануари-февруари во услови на раст на глобалната трговија, повторно разгорувајќи ги надежите дека подобрувањето на странската побарувачка ќе помогне да се поттикне пошироко закрепнување на кинеската економија, откако таа се повлече минатата година.
Како знак дека извозот веројатно ќе продолжи да биде стабилен во март, подгрупата за нови извозни нарачки во официјалниот PMI се врати на 51,3 и порасна за првпат во една година. Пошироката побарувачка исто така зајакна, при што бројот на нови нарачки се искачи на 53, највисоко во една година.
Кина се обиде да ги зголеми домашните трошења и вети дека ќе обезбеди владини средства за да ги охрабри потрошувачите и бизнисите да ги заменат старите стоки, вклучувајќи автомобили, апарати и опрема, што треба да биде благодат за индустриските фирми. Сè уште не се откриени детали како што е вредноста на ваквата финансиска инјекција.
„Гледано во перспектива, воведувањето политики како што е надградбата на опремата во големи размери ќе продолжи да ја поддржува побарувачката за производствениот сектор“, напиша Ксијао Џинчуан, аналитичар во „Гуангфа“ (Guangfa Securities Co.), во белешка во понеделникот.
Бројките објавени од Националното биро за статистика исто така покажаа дека мерачот на непроизводствена активност се искачил на 53 во март, повеќе отколку што проценуваа економистите.
.webp){kind=icon}