Американскиот претседател Доналд Трамп ѝ нареди на својата администрација да разгледа воведување реципрочни царини за голем број трговски партнери. Трамп во четвртокот потпиша меморандум со кој од своите трговски советници бара да пресметаат нови царински стапки за сите земји, со цел, како што вели, повторно да се избалансираат трговските односи. Сепак, според оцените на „Блумберг“ (Bloomberg), овој процес може да трае со недели или дури месеци.
ПОЛИТИКА
Што подразбираат царините на Трамп
Царините ќе бидат приспособени за секоја земја, за да се надоместат не само давачките на американската стока туку и нецаринските бариери што тие земји ги наметнуваат во вид на неправедни субвенции, прописи, даноци на додадена вредност, курсни разлики, слаба заштита на интелектуалната сопственост и други фактори што ја ограничуваат американската трговија, се наведува во копијата на меморандумот што го сподели Белата куќа.
Трамп им рече на новинарите дека ќе воведе увозни даноци на автомобили, полупроводници и фармацевтски производи покрај возвратните царини во некој подоцнежен период. Тој ги наведе бариерите во Европската Унија, вклучувајќи го и ДДВ, како пример на кој САД сакаат да одговорат. Исто така, тој ги издвои Јапонија и Јужна Кореја како земји што, според неговото мислење, ги искористуваат САД и кои би можеле да бидат цел на неговиот најнов потег.
БИЗНИС
„Епл“ и „Гугл“ го вратија Тикток
На корпоративен план, компаниите „Епл“ (Apple) и „Гугл“ (Google) го вратија Тикток (TikTok) во своите продавници за апликации во САД, откако добија уверувања дека нема да бидат казнети за неговата дистрибуција. Потсетуваме, двете компании минатиот месец ја отстранија апликацијата за да се усогласат со законот усвоен во 2024 година, со кој од „Бајтденс“ (ByteDance), сопственикот на Тикток, се бара да ја продаде популарната апликација или во спротивно ќе биде забранета на американскиот пазар. Сепак, Трамп на 20 јануари потпиша извршна наредба со која од американскиот врховен суд побара да ја одложи забраната за Тикток за 75 дена.
Bloomberg
ХСБЦ најави нов бран отпуштања
Британската банка ХСБЦ (HSBC) започнува нов бран отпуштања во својата инвестициска банка, како дел од реорганизацијата на своето работење, тврдат извори запознаени со ситуацијата. Најновата фаза на отпуштања ќе започне во Азија, но на крајот ќе ги погоди и вработените низ светот. Сè уште не е познато колку луѓе ќе бидат погодени од овој потег.
БЕРЗИ
Европа
Фјучерсите на европските акции утрово се тргуваат во зелено, пред објавувањето на конечните податоци за БДП на еврозоната за четвртиот квартал од минатата година. Според прелиминарните податоци, економијата на еврозоната пораснала во тој квартал за 0,9 отсто на годишно ниво, по речиси еднаков раст од претходниот квартал.
САД
И фјучерсите на американските индекси се тргуваат со добивки, пред објавувањето на податоците за малопродажбата и индустриското производство во САД. Потсетуваме, американските акции вчера се приближија до речиси рекордни нивоа, откако американскиот претседател Доналд Трамп најави скоро воведување реципрочни царини за сите земји што воведуваат царини на американската стока. Таквата најава, сепак, го погоди доларот, кој ослабе во однос на кошницата меѓународни валути.
Азија
И на берзите во азиско-пацифичкиот регион претежно се тргува со добивки. Акциите во континентална Кина и Хонгконг продолжија да растат, при што индексот Hang Seng скокна дури 2,9 отсто, приближувајќи се до рекордот од октомври минатата година.
.webp){kind=icon}
