ЕУ очекува удар тежок 28 милијарди евра од тарифите на Трамп

Европската унија проценува дека првиот бран царини на Доналд Трамп за челик и алуминиум ќе погоди дури 28 милијарди евра (29,3 милијарди долари) од извозот на блокот, што би претставувало огромна ескалација во трговската војна на американскиот претседател.

Обемот на стоки – за кои ЕУ проценува дека ќе вклучува деривати – би бил околу четири пати поголем од последниот пат кога Трамп го таргетираше металниот сектор во блокот, според луѓе запознаени со ставовите на ЕУ.

Високиот трговски претставник на ЕУ, Марош Шефчович, во петокот ги информираше амбасадорите на Унијата, за неговата посета на Вашингтон каде се состана со неговите американски колеги. Тој предупреди дека ситуацијата се менува и дека деталите и опсегот на тарифите сепак може да се променат, велат луѓето кои побараа да останат анонимни.

Како дел од неговите напори да ги преработи правилата за глобална трговија, Трамп најави серија тарифи, вклучувајќи царини од 25 отсто за извозот на челик и алуминиум, кои би можеле да стапат на сила на 12 март. Тој најави и реципрочни царини врз основа на политиките на партнерите кои се сметаат за бариери за американската трговија.

Тест за трансатлантска трговија/Bloomberg

Европската комисија, која има овластување за трговските акции на ЕУ, одби да коментира.

За ЕУ, борбата за американските царини за метали започна во 2018 година за време на првиот мандат на Трамп, кога САД погодија речиси 7 милијарди американски долари во европскиот извоз на челик и алуминиум со царини, повикувајќи се на загриженост за националната безбедност. Во тоа време, официјалните лица во Брисел се потсмеваа на идејата дека ЕУ претставува таква закана.

Во тој прв напад, САД ги погодија производите од челик со царини од 25 отсто и алуминиумот со 10 отсто и вклучија ослободувања за одредени производи. „Блумберг“ претходно објави дека овој пат не се планирани никакви исклучоци.

Блокот од 27 нации возврати со таргетирање на политички чувствителни компании со одмазднички мерки, вклучително и мотоциклите на „Харли Дејвидсон“ (Harley-Davidson). и фармерките „Леви штраус“ (Levi Strauss). Мерките се применуваа по производ и вклучија земјоделски производи и облека покрај производите од челик и алуминиум.

Двете страни се согласија за привремено примирје во 2021 година, кога САД делумно ги укинаа своите мерки и воведоа сет тарифни квоти над кои важат царините за метали, додека ЕУ ги замрзна сите свои рестриктивни мерки.

ЕУ соопшти дека ќе одговори брзо и пропорционално на американските тарифи и дека како прв чекор би можела повторно да ги активира списоците кои претходно беа суспендирани. Комисијата подготвуваше различни списоци со различни сектори и стоки насочени кон принципот на нанесување поголема штета на американската страна, објави претходно „Блумберг“.

Комисијата соопшти дека одмрзнувањето на суспендираните тарифи, кои се во мирување до крајот на март, може да се изврши брзо.

Американска стока цел на ЕУ за време на првата трговска војна на Трамп/Bloomberg

Шефчович, кој минатата недела се состана со американскиот секретар за трговија Хауард Лутник, Џејмисон Грир, неговиот избраник за американски трговски претставник и директорот на Националниот економски совет, Кевин Хасет, им кажал на претставниците на ЕУ дека атмосферата е позитивна, но сè уште немало преговори, велат луѓето.

Шефчович рече дека ја искористил средбата како прва точка на контакт за да отвори канали за комуникација и да се обиде да ги разоткрие тврдењата на Американците за кои рече дека се лажни, вклучително и дека европскиот данок на додадена вредност е неправеден кон САД, велат тие.

За да избегне трговски конфликт, Шефчович им понуди на своите американски колеги договор за намалување на царините за индустриски стоки, вклучително и автомобили, што е едно од долгогодишните барања на Трамп.

Во моментов нема коментари за веста. Биди прв да коментира...

Остави коментар