Економистите на компанијата „Голдман Сакс“ (Goldman Sachs Group Inc.) ги зголемија своите прогнози за инфлацијата во САД за оваа и следната година, делумно за да го земат предвид послабиот долар по објавата на царините од администрацијата на Трамп.
Клучната мерка на основната инфлација ќе се зголеми на 3,8 проценти до крајот на 2025 година, пред да забави на 2,7 проценти до крајот на 2026 година, што е зголемување во однос на претходните процени од 3,5 проценти и 2,3 проценти, наведоа економистите на „Голдман Сакс“, Рони Вокер и Елси Пенг, во извештајот објавен во средата. Во март оваа мерка, индексот на цени на лична потрошувачка исклучувајќи храна и енергенти, изнесуваше 2,6 проценти.
„Прво, доларот ослабе, а не зајакна, како одговор на вестите за царините, со што се засили, а не се ублажи, директниот ефект на царините врз цените“, наведоа во извештајот. „Второ, исклучително високите царински стапки на увозот од Кина ќе ја пренасочат побарувачката за увоз од оваа земја кон земји со повисоки трошоци за производство, но пониски американски царински стапки“.
Индексот Bloomberg Dollar падна за околу четири проценти од 2 април, кога претседателот Доналд Трамп најави широкораспространети царини за трговските партнери на САД. Тоа е спротивно на она што се случи во 2018 година, кога царините воведени за време на првиот мандат на Трамп помогнаа во зајакнувањето на доларот.
Bloomberg
Американските официјални лица неделава ќе отпатуваат во Швајцарија на трговски преговори со Кина. Економистите на „Голдман“ очекуваат царинската стапка на кинеската стока на крајот да биде намалена на 54 проценти, од сегашните 145 проценти.
„Очекуваме месечниот основен индекс на трошоци за лична потрошувачка или основната PCE-инфлација (англ. personal consumption expenditures price index - PCE) да забрза во текот на следните неколку месеци, на просечни 0,36 проценти месечно во периодот од мај до август“, рекоа Вокер и Пенг. „Нашата прогноза е умерено над пазарните очекувања за инфлацијата“.
.webp){kind=icon}
