Празничната распродажба годинава во САД ќе биде со намален раст

„Deloitte“ очекува дека трговците на мало ќе забележат помал раст на продажбата во текот на овогодинешната празнична сезона, која што трае од ноември до јануари, како резултат на забавувањето на економските активности во Соединетите Американски Држави (САД).

„Малопродажбата веројатно ќе биде дополнително погодена од намалувањето на побарувачката за долготрајни производи, што претставуваше главен двигатор за време на пандемијата“, рече Даниел Бахман, американски економист. „Меѓутоа, очекуваме поголема потрошувачка на услугите, како угостителските, бидејќи негативните ефекти од пандемијата продолжуваат да се намалуваат“, додава Бахман.

Консултантската компанија предвидува зголемување на продажбата за празниците од 4 до 6 проценти во 2022 година, во однос на претходната година, кога за одмори беа потрошени 1,39 илјади милијарди долари. Тогаш растот на продажбата во споредба со пандемиската 2020 година изнесуваше 15 проценти. Предвидувањата за овогодинешниот раст во апсолутна вредност е во рамки на трендот од пред пандемијата но, мора да се има предвид дека опсегот на продажба всушност е помал поради растот на цените.

Очекувањата се дека инфлацијата ќе ги поттикне потрошувачите да бараат попусти преку интернет. „Deloitte“ предвидува дека продажбата преку интернет ќе порасне меѓу 13 и 14 проценти. Лани преку е-трговија потрошени беа 231 илјади милијарди долари. Тоа е поголем раст од минатогодишниот, кој што изнесуваше 8,4 проценти.

За да се избори со очекуваното забавување во трговијата, „Walmart Inc.“ почна да промовира подароци поевтини од 25 долари. Така се обидува да ги привлече колекционерите на популарните марки на играчки како што се „Barbie“, „Pokemon“, „Star Wars“, „Lego“ и „Hot Wheels“.

„Знаеме дека купувачите пазарат порано и бараат најдобри понуди“, изјави во едно интервју Џесика Мирелес, директорка за продажба на играчки во Волмарт. „И оваа година имаме повеќе колекционерски играчки, дополнувајќи се на претходните години, со многу ексклузиви. Во тој дел навистина се обидуваме да понудиме повеќе колекционерски предмети ширум светот, без разлика дали колекционерите се деца или возрасни“, додава директорката на Волмарт.

И другите трговци на мало се обидуваат да ги привлечат потрошувачите, чија куповна моќ е ослабната.

„Best Buy Co.“ ги враќа празничните промоции. Побогатите купувачи бараат подобри цени кај „Kohl's Corp.“, додека „Target Corp.“ продолжува да ги намалува цените на производите обидувајќи се да ги расчисти вишоците залихи. Во меѓувреме, продавачите преку Амазон (Amazon.com Inc.) се подготвуваат за празничната сезона и многумина од нив се плашат дека ќе бидат присилени да ги намалат цените за да се ослободат од големите залихи непродадени производи.

Во моментов нема коментари за веста. Биди прв да коментира...

Остави коментар