Уф, не знам, еве еден модел за технолошки стартапи и ризичен капитал:
Поголемиот дел од повратот на ризичен капитал доаѓа од инвестирање во рана фаза во компании што продолжуваат да го менуваат светот на радикален и неочекуван начин.
Затоа, ако сте инвеститор во ризичен капитал, треба да направите ризични инвестиции во визионерски претприемачи со диви и неочекувани идеи: многумина нема да успеат, а некои ќе бидат измамени, но еден или двајца може да добијат на големо, а патот до успехот е да имате една или две компании што радикално ќе го променат светот.
Затоа, ако сте технолошки претприемач, треба да се претставите како визионер со авантуристички дух, бидејќи инвеститорите во ризичен капитал (оправдано) го бараат тоа и ќе ви дадат пари.
Оттука, ако сте технолошки претприемач, треба да земате халуциногени дроги за (прво) да можете да замислите неверојатна иднина и (второ) да бидете некако чудни за разговор.
Ако сте технолошки инвеститор во ризични средства, треба да користите халуциногени дроги за да бидете на истата бранова должина со претприемачите визионери.
Bloomberg
Не дека премногу сакам да го одобрувам овој модел или ништо слично, но еве едно момче во „Волстрит журнал“ (Wall Street Journal) што верува во тоа.
Спенсер Шулем, извршен директор на стартапот „Билд бетер“ (BuildBetter.ai), вели дека користи ЛСД на секои три месеци, бидејќи тоа му го зголемува фокусот и му помага да размислува покреативно. Додека работи сам по работното време, понекогаш зема многу мала доза, со која, како што вели, никој не би знаел дека е на ЛСД. Во други ситуации, тој зема поголема доза сам и се поврзува со природата одејќи на планинарење.
Шулем, кој живее во Њујорк, вели дека високите очекувања на фирмите за ризичен капитал и инвеститорите воопшто може да ги наведат основачите да се свртат кон психоделици за да си обезбедат предност. „Тие не сакаат нормална личност, нормална компанија“, истакнува тој. „Сакаат нешто извонредно. А никој не е роден извонреден“.
Не сте родени извонредни, но ако земате доволно дроги, ќе мислите дека сте извонредни, а ако и тие земат доволно, ќе се согласат со тоа. Статијата е за тоа како сите во Силициумската Долина се на дрога.
Илон Маск зема кетамин. Сергеј Брин понекогаш ужива во магични печурки. Директорите на фирмата за ризичен капитал „Фаундерс фонд“ (Founders Fund), позната по своите инвестиции во „Спејс екс“ (SpaceX) и „Фејсбук“ (Facebook), организираа забави што вклучуваат психоделици.
Рутинската употреба на дрога транзитираше од активност по работното време во корпоративна култура, оставајќи ги одборите и деловните лидери да се борат со своите одговорности за работната сила што често ја користи. Во авангардата се технолошките директори и вработените што на психоделиците и сличните супстанции, како псилоцибин, кетамин и ЛСД, гледаат како на портали за нови и иновативни деловни откритија.
„Во моментов има милиони луѓе што микродозираат психоделици“, вели Карл Голдфилд, поранешен консултант за продажба и маркетинг во Сан Франциско, кој неформално ги советува пријателите и колегите од целиот технолошки свет за одредување на вистинското количество мала доза што ќе предизвика максимална посветеност. Тоа е „најбрзиот пат да го отворите вашиот ум и јасно да видите што се случува“, рече Голдфилд.
Јас генерално не барам фармаколошки објаснувања за општествени или деловни феномени, на пример не верувам дека FTX пропадна затоа што сите негови вработени беа на риталин. Но, би било многу смешно ако приказната за американската технолошка индустрија во 21 век, добра или лоша, е главно „ЛСД и кетамин“.
Depositphotos
Дрогите помагаат за деловни идеи:
Некои претприемачи микродозираат за да извлечат придобивки, често со надеж дека ќе ја ублажат анксиозноста или ќе го изострат фокусот. Други во технологијата велат дека земаат целосни дози, за што го користат терминот макродоза, додека се обидуваат да достигнат врвно ниво што ќе ги одведе до нова голема идеја. Голдфилд го опишува тоа како „смрт на егото“, искуство кога корисникот доаѓа до суштината на своето битие и се „отпушта“.
Како и со одлуките за корпоративна стратегија:
Тим Сае Ку бил основач на стартап за дигитален маркетинг во Сан Франциско кога ги открил психоделиците на музичкиот фестивал „Коачела“ во 2014 година.
Тој вели дека му помогнале да сфати дека го започнал својот бизнис за да ја направи својата мајка горда, но дека е време да го продаде. „Многу такви сознанија во моето психоделично искуство ми помогнаа да разјаснам дека сум ја започнал компанијата за да залечам рана“, објасни тој.
Претходно сугерирав дека голем процент од активностите за спојување и преземање може да бидат водени од директори што сакаат да избегнат да поминуваат време со своите деца. Имам помала интуиција за тоа колку активностите за спојување и преземање се водени од директори што постигнуваат пробив, преку терапија или психоделици, во разбирањето на нивниот однос со своите родители, но сигурно има такви ситуации. Банкарите за спојување и преземање треба да водат ајахуаска-церемонии; па, кога дрогата ќе почне да дејствува, тие можат да речат „мајка ти се гордее со тебе, време е за продажба, еве ти пичбук со некои индикативни вреднувања“.
Сепак, постојат прашања околу корпоративното управување:
Силициумската Долина долго време има толеранција кон употребата на дрога, многу компании не ги тестираат вработените редовно, но феноменот загрижува некои фирми и нивните одбори, кои стравуваат дека тие би можеле да бидат одговорни за нелегални активности, велат консултанти и други блиски извори.
Општиот модел може да биде дека инвестирањето во раните фази на стартап е за идентификување луѓе со визионерски идеи, а управувањето со зрели јавни компании е за да се осигури дека се раководени од одговорни возрасни лица, но не секогаш луѓето со визионерски идеи се (или ќе пораснат во) одговорни возрасни луѓе. Постои транзиција помеѓу компаниите во рана фаза и зрелите компании, што може да бара промена на персоналот или барем промена на однесувањето. Халуциногените можеби се потребни за луѓето со идеи, а забранети за одговорните возрасни лица. Ако сте некаков вид технолошки основач, може да почнете да земате халуциногени затоа што вашиот одбор на директори ги сака, а потоа подоцна мора да престанете да земате халуциногени затоа што вашиот одбор на директори ги мрази.
.webp){kind=icon}
