.webp){kind=icon}
Веројатно менувањето на логото на сината птица на Твитер во „Х“ има совршена смисла. Како познат симбол за исклучување на нешто, X буквално ги сумира достигнувањата на оваа социјална мрежа под водство на Илон Маск.
Заминаа многу корисници на Твитер, половина од огласувачите, 80 отсто од вработените и оперативната стабилност на компанијата. Нејзиниот кредибилитет како водечка платформа за следење на вести во живо, форум за активизам и промени или место едноставно да се информирате за тоа што ве интересира, исчезна.
Следно - освен ако сето ова е една голема измама, што не може веднаш да се исклучи - единствено нешто што сè уште додава вредност на купувањето на Маск од 44 милијарди долари е брендот на Твитер. Социјалната мрежа во иднина ќе биде позната како X, одлучи Маск. Малата сина птица, светски позната, е осудена да исчезне.
Во серија збунувачки твитови во неделата, полни со корпоративен жаргон, извршната директорка на X, Линда Јакарино, ја објасни визијата на Маск за апликација која нуди аудио, видео, пораки, банкарство и „сè“. Таа напиша дека X ќе биде „идната состојба на неограничена интерактивност“. (Не, ни мене не ми е јасно.)
Оптимистички, брендот на Твитер носи многу „багаж“, како што самиот ко-основач Џек Дорси призна во неделата, така што нов почеток можеби е најдобриот начин да се повлече линија помеѓу старото и новото.
Но, спроведувањето на ова „ребрендирање“ од страна на Маск покажува дека тоа не е добро осмислена идеја. „Привременото“ лого X изгледа како да е направено со Ворд арт (WordArt). Доменот X.com, во добар дел од минатата недела, ја прикажуваше само страницата на хостингот GoDaddy, бидејќи не беше правилно конфигурирана.
Маск тврди дека постапува според оригиналната визија за Х што ја имал од 1999 година кога го купил доменот X.com. Подоцна, мудри луѓе го советувале дека „Пејпал“ (PayPal) е подобро име за давател на платежни услуги. Тој совет му помогна да заработи богатство.
Неколку децении подоцна, Маск сè уште е опседнат со „Х“, очигледно незадоволен што тоа сè уште е само име на неговото дете. Очигледно му недостасуваат разумни луѓе за да го советуваат, бидејќи Маск сега верува дека името X може да помогне да се трансформира Твитер во „супер апликација“ слична на кинеската Вичет (WeChat). Овој производ на „Тенсент“ (Tencent Holdings) има околу 1,3 милијарди корисници и комбинира повеќе услуги во една исклучително моќна апликација. Други примери го вклучуваат Граб (Grab), кој нуди транспорт, храна и финансиски услуги во jугоисточна Азија.
На прв поглед, би требало да биде лесно да се имитира успехот на тие апликации, особено со предноста на поседување популарна социјална мрежа која луѓето ја проверуваат повеќе пати на ден. Но, ветената земја за американска суперапликација е неостварлива дури и за компании кои се поголеми, побогати и попаметни од Х. Западните потрошувачи, покрај тоа што се повеќе приврзани за нивните начини на плаќање и банкарство, се помалку склони да дозволат една компанија да контролира толку голем дел од нивните животи.
Условите што им овозможија на суперапликациите да успеат во Азија, каде што првото искуство на интернет за многу луѓе беше преку мобилни уреди, а не преку компјутери, едноставно не важат за пазарите што ги таргетира Маск. Американските потрошувачи не се (во повеќето случаи) без банка или без кредитни опции. Постојните начини на управување со пари имаат свои недостатоци, но тие се доволно добри за да го отежнат воведувањето нови услуги. Освен тоа, Маск не е ни подготвен - тој сè уште ги бара потребните регулаторни одобренија.
Дури и компаниите кои доминираат во многу области - како „Алфабет“, матичната компанија на „Гугл“ - сфатија дека потрошувачите не сакаат сè да биде собрано во една суперапликација, поради што Гугл мапс (Google Maps), Јутјуб (YouTube) и Џимејл (Gmail) се одвоени. И „Мета“ има „семејство на апликации“. „Убер“ (Uber Technologies) ја одвојува апликацијата за превоз низ град од Uber Eats. Ова делумно се должи на фактот што апликациите кои се обидуваат да направат премногу стануваат преполни и бавни.
Маск едноставно не ги разбира потребите на секојдневните корисници на интернет. И ова не е првпат да ја потцени тежината и изводливоста на неговите грандиозни идеи. Тој сметаше дека елиминирањето на ботови на Твитер ќе биде тривијална работа, но всушност го влоши проблемот. Тој мислеше дека самоуправувачките автомобили на „Тесла“ до сега ќе патуваат од брег до брег. Мислеше дека „брзо“ ќе добие дозвола за изградба на тунел од Њујорк до Вашингтон.
Сега верува дека „ако сè направи правилно, [X] ќе стане половина од глобалниот финансиски систем“. Во извршувањето на таа цел, тој очигледно е подготвен да го уништи сè уште вредниот бренд на Твитер. Барем вака ќе може да тврди дека тоа го направил намерно.
