„Македонски Телеком“ ќе ги жнее плодовите од инвестициите

„Македонски Телеком“ годината ја започна со раст на нето добивката од 15,1 проценти во однос на првиот квартал од минатата година. Причините за добриот резултат може да се најдат на две страни: прво, во финансискиот резултат, каде што финансиските приходи се повисоки за 192,2 проценти, а финансиските расходи се намалени за 9,9 проценти и второ, во растот на ЕБИТДА за 4,4 проценти. Повисокиот раст на приходите од растот на трошоците, покрај растот на ЕБИТДА, влијаеше и на зголемувањето на маржата на ЕБИТДА на 42,2 проценти, што е за 0,8 процентни поени повеќе од крајот на првиот квартал од минатата година.

Мобилните услуги продолжија да го поддржуваат растот на целата компанија со зголемување од 5,5 проценти, иако тој раст беше делумно неутрализиран со падот на приходите од фиксниот сегмент од 1,3 проценти од годишно ниво. „Македонски Телеком“ во споредба со крајот на минатата година благо ја зголеми својата корисничка база (само околу еден процент), растот на бројот на корисници е побавен од растот на пазарот бидејќи пазарниот удел е намален за 0,7 процентни поени. Постпејд пакетите влијаеја поголем број корисници да се префрлат од припејд пакетите, а дополнително на растот од 2,5 проценти на сегментот мобилна телефонија влијаеја и приходите од роаминг и приходите од мобилен интернет. Постпејд пакетите со себе ја понесоа и продажбата на мобилни уреди, каде што „Македонски Телеком“ дел од приходите ги остваруваше од поголем обем на продажба, а дел поради зголемената просечна продажна цена по уред. Приходите од продажба на уреди пораснаа за 13,7 проценти во првите три месеци од 2024 година во споредба со истиот период минатата година. Растот на бројот на корисници, растот на постпејд пакетите и повисоките цени на уредите резултираа со зголемување на просечниот ARPU за 2,4 проценти на годишно ниво.

Инфраструктурните инвестиции му донесоа на „Македонски Телеком“ и поголем број приклучоци на широкопојасната мрежа за 3,4 проценти и зголемување на бројот на оптички пристап кој годишно бележи раст од 15,3 проценти. Како што „Македонски Телеком“ напредуваше во делот на малопродажба, големопродажбата е полето каде што постигнува полоши резултати во однос на првиот квартал лани - приходите се помали за 10,6 проценти поради намалувањето на приходите од меѓународниот транзит кон други оператори. ИКТ проектите не се реализираат на минатогодишно ниво, па приходите се за 12,1 проценти помали од тој дел.

На страната на трошоците, поголемата продажба на уреди повлече раст на трошоците  на продадените производи за 9,2 проценти, но и зголемувањето на бројот на вработени доведе до зголемување на трошоците за персонал до 16,4 проценти годишно. Бројот на вработени се зголеми како резултат на одлуката во втората половина на 2023 година одржувањето на телекомуникациската мрежа да се интегрира во системот на компанијата. И покрај растот на овие две категории, „Македонски Телеком“ успеа да ја зголеми категоријата вкупни трошоци за само 1,8 проценти пред се поради намалување на трошоците за електричната енергија (главно поради намалувањето на цената на глобално ниво) за 35,8 проценти.

Очекувања

За „Македонски Телеком“ очекуваме дека 2024 година ќе ги донесе плодовите на минатогодишните инвестиции, пред се во делот на широкопојасен и оптички пристап. Тој сегмент ќе го поткрепи натамошниот раст на вкупните приходи, кои очекуваме да растат со ниски едноцифрени стапки. Сегментот мобилна телефонија ќе расте пред се поради ценовната компонента, но постои ризик корисничката база на „Македонски Телеком“ да не расте со брзина на раст на пазарот. Со одлуката да интегрира дел од одржувањето и управувањето со инфраструктурата во својот систем, „Македонски Телеком“ создаде база за развој на нови решенија базирани на постоечки производи и можност за развој на нови дигитални платформи. Притисокот врз ЕБИТДА првенствено ќе доаѓа од категоријата раст на платите поради новодојдените работници за одржување на инфраструктурата, но компанијата може да смета на пониски трошоци за струја годинава, со што ќе се олесни целата категорија на трошоци. Затоа, разумно е да се очекува дека ЕБИТДА ќе биде во функција на растот на приходите и дека ќе се менува во согласност со динамиката на генерирање на приходите.