Надежите за договор меѓу САД и Иран ги кренаа акциите на рекордно ниво

Надежите дека САД и Иран повторно ќе седнат на преговарачка маса ги искачија акциите на рекордни нивоа, при што пазарот доби дополнителен поттик и од силната прогноза на „Интел“ (Intel Corp.) и затворањето на истрагата против претседателот на Фед, Џером Пауел.

Раст од речиси 1 отсто на S&P 500 во петокот го однесе индексот до неговата најдолга неделна серија добивки од 2024 година. Трамп испрати двајца преговарачи во Пакистан со намера да разговараат со иранските претставници. Американската нафта падна кон 94 долари. Приносите на државните обврзници се намалија откако одлуката на Министерството за правда во врска со Пауел потенцијално го расчисти патот за потврда на Кевин Ворш како следен лидер на ФЕД, при што трговците ги зголемија облозите за намалување на каматните стапки.

Bloomberg

Специјалниот пратеник Стив Виткоф и зетот на претседателот Џаред Кушнер треба да заминат во сабота на разговори овој викенд, изјави портпаролката на Белата куќа Каролин Левит за „Фокс њуз“.

„Њујорк тајмс“ објави дека иранскиот министер за надворешни работи Абас Арагчи планира да се сретне со американската делегација и има намера да предаде писмен одговор на мировниот предлог.

Трговците внимателно ги следат движењата на двете делегации за сигнали дали мировните разговори ќе се остварат, надевајќи се на обновување на протокот низ клучниот Ормуски теснец. И покрај геополитичките ризици, силните корпорациски резултати и инаку отпорната економија ги поддржаа акциите.

Акциите ја забележаа најдолгата неделна серија раст од 2024 година

Bloomberg

 

„Веруваме дека силниот раст на заработките е клучна причина што пазарите станаа помалку чувствителни на геополитички наслови и осцилации на цените на нафтата“, изјави Анџело Куркафас од „Едвард Џонс“ (Edward Jones).

Оживувањето на глобалната технолошка трговија дополнително го засили оптимизмот кај инвеститорите. Индексот на производители на чипови порасна 18-ти ден по ред, додека „Интел“ достигна рекордно високо ниво. „САП“ (SAP SE) објави раст на приходите од облачните услуги над проценките, додека „ТСМ“ (Taiwan Semiconductor Manufacturing Co.) скокна откако тајванскиот финансиски регулатор ги олесни ограничувањата за удели во фондови со една акција.

„Гугл“ (Google) ќе инвестира 10 милијарди долари во „Антропик“ (Anthropic PBC), со можни дополнителни 30 милијарди долари подоцна, зацврстувајќи ја врската меѓу две компании кои истовремено се партнери и ривали во трката за развој на вештачка интелигенција.

Гледајќи напред, пет од таканаречените величествени седум — „Амазон“ (Amazon.com Inc.), „Алфабет“ (Alphabet Inc.), „Мета“ (Meta Platforms Inc.), „Мајкрософт“ (Microsoft Corp.) и „Епл“ (Apple Inc.) — треба да објават резултати следната недела.

Корпорациски вести:

„Проктер енд Гембл“ (Procter & Gamble Co.) објави посилни од очекуваните резултати за последниот квартал, но предупреди дека повисоките цени на нафтата предизвикани од војната на Блискиот Исток може да донесат дополнителни трошоци од 1 милијарда долари во следната фискална година.

Новата таблета за слабеење „Фаундајо“ на „Ели Лили“ (Eli Lilly & Co.) стартувала бавно, според нови податоци за рецепти, што е почетен знак за предизвикот со кој ќе се соочи компанијата додека се обидува да го стигне ривалот „Ново Нордиск“ (Novo Nordisk A/S).

„ХЦА“ (HCA Healthcare Inc.) одлучи да не ја зголеми годишната прогноза за профит и продажба иако добивката во првиот квартал ги надмина проценките на аналитичарите, што значи дека гледа можни предизвици подоцна во годината.

„СЛБ“ (SLB), најголемиот светски давател на услуги за нафтени полиња, објави резултати за првиот квартал под очекувањата на аналитичарите, додека војната со Иран го потресува глобалниот енергетски сектор.

„Њумонт“ (Newmont Corp.) планира откуп на акции во вредност од 6 милијарди долари, додека најголемиот светски производител на злато настојува да ги награди инвеститорите среде невиден раст на цените на благородниот метал.