Мајкл Бери повторно предупредува на берзански крах и советува продажба

Мајкл Бери, инвеститорот според чија приказна е снимен филмот „Обложување на столетието“ („The Big Short“), предупредува дека индексот Nasdaq 100 се движи кон драматичен пресврт по скокот што ги доведе технолошките процени до неодржливи височини.

Во објава на „Сабстак“ (Substack), Бери посочи дека пазарот личи на врвот на балонот дот-ком (dot-com) непосредно пред да пукне, наведувајќи го особено стрмниот скок на акциите на чипови што го зголеми индексот за полупроводници на берзата во Филаделфија за речиси 70 отсто од крајот на март.

Тој истакна дека Nasdaq 100, според негова процена, се тргува со 43 пати поголема заработка - далеку над имплицираното ниво од околу 30 пати - затоа што „Волстрит можеби ја преценува за повеќе од 50 отсто заработката на нашите најбрзорастечки, најценети компании“.

„Сведоци сме на историја. На берзата, тоа не е добра работа“, вели Бери. Тој ја спореди ситуацијата со „сцена од крвава сообраќајна несреќа неколку минути пред да се случи“.

Бери е меѓу големиот број пазарни набљудувачи што изразија загриженост во врска со растот предизвикан од бумот на трошење за вештачка интелигенција од страна на „Алфабет“ (Alphabet Inc.), „Амазон“ (Amazon.com Inc.) и другите големи технолошки компании. Тоа ги поттикна индексите на рекордно високо ниво, дури и кога војната на САД против Иран се заканува да го забави растот и да ја поттикне инфлацијата со зголемување на цените на нафтата.

Аналитичарите на СКР (Sundial Capital Research), предводени од Џејсон Гепферт, забележаа дека ова ќе биде само четврти пат S&P 500 да достигне рекордно високо ниво, додека само 5 отсто од неговите членови беа на 52-неделен минимум, што го нагласува обемот на растот. Податоците собрани од БИГ (Bespoke Investment Group) покажуваат дека индексот за полупроводници во Филаделфија се искачил толку високо над својот 200-дневен подвижен просек само во два други случаја, во јули 1995 година и во март 2000 година, на врвот на интернет-балонот.

Бери советува да не се шортираат акциите, со оглед на цената на пут-опциите и ризикот да бидат изгорени од несоодветни тргувања.

Тој вели дека држи „значајна левериџирана кратка позиција наспроти портфолио на компании“ што ги смета за „депресивни и евтини“, без да образложува, и планира да се „олесни од компаниите“ што не ги исполнуваат неговите „најстроги барања за вреднување“. Тој советува да се искористи профитот од неодамнешниот раст и да се намали изложеноста на акции воопшто, особено на оние од технолошкиот сектор.

„Дури и ако се чини дека има повеќе време, секој што има среќа да ги користи овие параболични движења, со тоа што не продава, се обложува на сопствената способност да скокне навреме на или блиску до врвот“, напиша тој.

„Историјата покажува дека дури и ако забавата продолжи уште една недела, месец, три месеци или година, исходот ќе бидат многу пониски цени“, нагласи Бери. „Влегуваме во тој редок воздух, толку екстремен што последиците ќе бидат неизбежни, без разлика каде се крие некој.“