Акциите на „Роблокс“ пораснаа по веста дека Русија би можела да ја одблокира гејминг платформата

Акциите на „Роблокс“ (Roblox Corp.) скокнаа по наодите дека руските владини агенции предложиле укинување на ограничувањата за платформата за игри на компанијата, иако секоја конечна одлука останува на органите за спроведување на законот.

Акциите пораснаа за 3,42 отсто во 10:43 часот наутро во Њујорк на 43,70 долари,  откако претходно во вторник пораснаа за дури 5,37 отсто.

Руското Министерство за дигитално работење и надзорниот орган за комуникации, Роскомнадзор, апелираа до агенциите за спроведување на законот да ја укинат забраната за платформата за игри за деца, велејќи дека компанијата дала гаранции дека ќе се придржува до рускиот закон, објави новинската служба Интерфакс.

Русија го забрани „Роблокс“ во декември поради несоодветна содржина за која Роскомнадзор рече дека може „негативно да влијае на духовниот и моралниот развој на децата“. Кратко потоа, Русија ги блокираше и “Снепчет“ (Snapchat) на „Снеп“ (Snap Inc.) и „Фејс Тајм“ (FaceTime) на „Епл“ (Apple Inc.), велејќи дека услугите се користат „за организирање и извршување терористички акти“.

Овој потег е во спротивност со претходните потези на руските власти, кои водеа немилосрдна кампања против платформите на социјалните медиуми, вклучувајќи ги „Јутуб“, „Фејсбук“ и „Инстаграм“ , како дел од напорите за зајакнување на безбедноста и потиснување на протестите во општеството. Неодамна, тие презедоа мерки за ограничување на пристапот до сервисот на “Телеграм“. Заострувањето на ограничувањата за интернет, исто така, помогна во поттикнувањето на растечкото незадоволство.

Одделно, рускиот мобилен оператор „Билајн“ (Beeline) соопшти дека ќе дозволи пристап до меѓународни услуги како што се „Нетфликс“ (Netflix), „Спотифај“ (Spotify) , „Тикетемастер“ (Ticketmaster),  и други услуги што се во согласност со законите на земјата и во моментов не се блокирани од Роскомнадзор, објави новинската агенција „Тас“ (Tass).