Обидот за закрепнување на азиските акции по глобалната распродажба предводена од технолошкиот сектор во вторникот не успеа да се одржи, откако нов бран продажби го погоди секторот.
Индексот MSCI Asia Pacific беше во пад од 0,9 отсто, откако претходно во текот на денот порасна речиси 1 отсто. Акциите на водечкиот производител на чипови „ТСМЦ“ (Taiwan Semiconductor Manufacturing Co.), кој учествува со повеќе од 10 отсто во регионалниот индекс, загубија повеќе од 3 отсто, откако во голема мера ја избегнаа пошироката распродажба во претходната сесија. Јужнокорејскиот индекс Kospi ги избриша првичните добивки, иако акциите на „Самсунг електроникс“ (Samsung Electronics Co.) добија поддршка од извештај дека компанијата би можела да објави откуп на сопствени акции. Фјучерсите на американските акции благо пораснаа.
На другите пазари, индексот на доларот се искачи на највисоко ниво во последните седум месеци, бидејќи слабоста на акциите ја зголеми побарувачката за сигурни засолништа. Нафтата Брент поевтини за околу 1 отсто и се доближи до 76 долари за барел, откако сообраќајот на танкери низ Ормускиот Теснец стана повидлив по привремениот мировен договор меѓу САД и Иран.
Нестабилната позадина на пазарите на акции дополнително го насочи вниманието кон резултатите на производителот на мемориски чипови „Микрон технолоџи“ (Micron Technology Inc.), кои ќе бидат објавени во среда и би можеле да дадат клучни сигнали дали побарувачката за инфраструктура за ВИ останува доволно силна за да го одржи овогодишниот раст на секторот. Искусниот стратег Луис Навелиер изјави дека извештајот ќе биде големото финале на „впечатливата“ сезона на резултати.
„Меурот околу ВИ е убедливо најголемиот берзански меур што човештвото некогаш го видело — и по размер и по обем, ако се земат предвид задолжувањето што стои зад него и огромната еуфорија што ги понесе вреднувањата нагоре“, изјави за Блумберг ТВ, Пол Гемблс, управувачки партнер во „МБМГ“ (MBMG Group). „Но, не мислиме дека пазарите сѐ уште се предале. Има уште многу простор за пад пред да дојде до вистински бродолом.“
Пад на акциите на производителите на чипови
Големи осцилации во јуни кај акциите на производителите на полупроводници
Bloomberg
Акциите на „Микрон“ паднаа за 13 отсто во вторникот, но и натаму се повисоки за повеќе од 250 отсто во 2026 година. Акциите на „Серебрас системс“ (Cerebras Systems Inc.) исто така се намалија за околу 11 отсто во доцното тргување во САД, откако новолистираниот производител на чипови објави годишна прогноза за продажба што ги разочара инвеститорите кои очекуваа компанијата да освои поголем дел од пазарот на ВИ центри за податоци.
Овие движења укажуваат на обновени стравувања дека растот поттикнат од ВИ можеби отишол предалеку и пребрзо. Азискиот реferenten индекс потона за 3,6 отсто во вторникот, што е најголем пад од почетокот на март, додека Kospi загуби 10 отсто. Распродажбата се прелеа и на американските пазари, при што Nasdaq 100 потона за 3,3 отсто, а S&P 500 ослабе за 1,4 отсто. Внимателно следениот индекс на полупроводници — кој повеќе од двојно се зголеми од најниските нивоа достигнати за време на воениот конфликт — изгуби околу 8 отсто.
Загриженоста дали огромните инвестиции на технолошките компании ќе создадат доволно високи приноси, заедно со високите вреднувања и пренатрупаните позиции на инвеститорите, повремено предизвикува силни корекции кај акциите поврзани со ВИ. Сепак, се очекува пазарите на акции да ја завршат првата половина од 2026 година со исклучително силни добивки. Со раст од околу 13 отсто од крајот на март, индексот MSCI All Country World е на пат да го оствари најдобриот квартал од периодот што заврши на 31 декември 2020 година.
Факторите што ја засилуваат волатилноста
За Kospi, распродажбата во вторникот беше една од најголемите во историјата, бидејќи пресвртот во расположението на инвеститорите кон секторот на чипови предизвика брзо затворање на позициите финансирани со задолжување на најуспешниот светски пазар на акции.
„Одливите од производите со финансиска потпора, кои дополнително ја засилуваат волатилноста на пазарот, веројатно вчера работеа со полна сила и брзо се исцрпија, отворајќи пат за денешното закрепнување во Јужна Кореја. Но, тоа не важи за Тајван, кој, гледано наназад, беше релативно мирен во вчерашната сесија и покрај тоа што има слична чувствителност на глобалните приказни поврзани со технолошкиот хардвер“, изјави Хомин Ли, стратег во „Ломбар Одие“ (Lombard Odier) во Сингапур.
Во меѓувреме, индонезиските акции беа во пад од околу 1,5 отсто, откако „МСЦИ“ повторно го одложи преиспитувањето на пазарот на акции во земјата, наведувајќи дека му е потребно повеќе време за да процени дали неодамна најавените реформи за транспарентност даваат резултати. Компанијата уште во јануари предупреди на можноста Индонезија да биде деградирана во категоријата гранични пазари поради загриженост околу инвестибилноста.
Провајдерот на индекси со седиште во Њујорк, исто така, ја задржа Јужна Кореја во групата пазари во развој.
Индексот Bloomberg Dollar Spot порасна за 0,1 отсто и е на пат кон трет последователен ден на добивки. Златото падна втор ден по ред под притисок на посилниот долар и распродажбата во технолошкиот сектор, што ги натера инвеститорите да ги намалат позициите во благородниот метал за да ги покријат загубите на други места.
На пазарот на обврзници, американските државни хартии од вредност се стабилизираа по растот во вторникот, бидејќи распродажбата на акциите и падот на цените на нафтата беа протолкувани како фактори што го намалуваат притисокот врз Фед да ги зголемува каматните стапки за да ја ограничи инфлацијата.
Аукцијата на двегодишни американски државни обврзници привлече силна побарувачка околу една недела по првата прес-конференција на Кевин Ворш како претседател на Фед, која предизвика силен раст на приносите бидејќи трговците вградија очекувања за дополнително заострување на монетарната политика како одговор на растечката инфлација. Вниманието сега е насочено кон податоците за личната потрошувачка што ќе бидат објавени оваа недела и кои би можеле да дадат нови сигнали.
Посветеноста на Ворш кон намалување на инфлацијата го зајакнува кредибилитетот на Фед, поддржувајќи ги приносите на долгорочните американски државни обврзници и пониска премија на рок, оценуваат од „Ситадел секјуритис“ (Citadel Securities).“
Тргувањето на американскиот пазар на државни обврзници вреден 31 билион долари од состанокот на Фед минатата недела се карактеризира со релативно постабилни приноси на долг рок во споредба со двегодишниот сегмент, кој е почувствителен на монетарната политика, а „високо кредибилен Фед треба да биде позитивен за долгорочните каматни стапки“, изјави Нохшад Шах, раководител за продажба на инструменти со фиксен принос за регионот Европа, Блискиот Исток и Африка во компанијата.
.webp){kind=icon}
