Слабоста на „седумте величествени“ станува проблем за Волстрит

Од „релито“ на берзата во 2026 една значајна група на акции е прилично отсутна: американските технолошки гиганти што претходно го „јаваа бикот“ речиси цели четири години.  

Индексот на „Седумте величествени“, кој ги вклучува акциите на „Амазон“, „Алфабет“, „Епл“, „Енвидија“, „Мајкрософт“, „Мета“ и „Тесла“ од почетокот на годинава после големите осцилации  досега речиси и да нема промена во вредноста, дури и додека бумот на вештачката интелигенција што го финансираат истите овие компании продолжува да ги поттикнува другите технолошки имиња. Групата како целина заостанува зад 300 акции во индексот S&P 500 оваа година, вклучувајќи ги и релативно помалите компании како „Долар три“ (Dollar Tree Inc.) и „Хабел“ (Hubbell Inc.)

Овој тренд ги вознемирува прогнозерите на Волстрит, кои сметаа на групата, која сочинува една третина од „тежината“ на S&P 500, кога прогнозираа дека индексот ќе ја заврши годината на 7.824,09 поени, во просек. Доколку продолжи сегашниот тренд на стагнацијата на технолошките гиганти, остатокот од S&P 500 ќе треба да се зголеми за 6,8 отсто до крајот на декември, покрај 13 отсто што веќе ги доби оваа година, за таа цел да стане реалност.

„Оттука, мислам дека би било тешко за S&P да продолжи да напредува без учество на седумката, особено затоа што толку многу сектори кои значително пораснаа, како што е енергетиката на пример, се предмет на одреден пад, исто така“, рече Алонсо Муњоз, главен инвестициски директор во „Хамилтон Капитал Партнерс“ (Hamilton Capital Partners.) „Овие имиња, величествената седумка, имаат значително влијание врз индексите дали се нагоре или надолу.“

 

Компаниите со најголема капитализација на берзата заостануваат зад останатите членки на S&P 500 годинава

Bloomberg Mercury

 

„Седумте величествени“, со чиишто акции се одбележа поголемиот дел од трговијата изминатата деценија, ја изгубија својата привлечност оваа година бидејќи вниманието се префрли на најголемите корисници на напливот пари посветени на градење на вештачка интелигенција. Производителите на чипови станаа претпочитан начин за „играње“ со акции од секторот технологија, туркајќи го специјализираниот индекс за овој сектор, „Филаделфија“ (Philadelphia Stock Exchange Semiconductor Index) за 78 отсто оваа година, во споредба со добивката од 0,5 отсто на индексот на „Седумте величествени“ на „Блумберг“.

Тоа ги става во опасност целите за до крајот на годината. Стратезите во просек очекуваат S&P 500 да ја заврши 2026 година на 7.824,09, што подразбира пораст од речиси 5 отсто од затворањето во средата. Мислењата на луѓе како Ед Јардени и Џон Столцфус од „Опенхајмер“ се уште порозеви и сугерираат дека индексот од 500 членки ќе надмине 8.000 поени пред јануари.

Доколку групата „Седум величествени“ продолжи да напредува со ова темпо на полжав, товарот паѓа на преостанатите 493 акции за да го носат растот. Акциите кои не се дел од „седумката“ би морале да пораснат за 6,8 отсто за да ја достигнат просечната цел на крајот на годината, според проценките на „Блумберг“.

Во изминатите две недели, набљудувачите на пазарот во „Морган Стенли“, „Голдман Сакс Груп“ и „Џеј Пи Морган Чејс“ рекоа дека слабите перформанси на групата, во однос на производителите на чипови и поширокиот пазар во целина, отишле предалеку.

За Лиза Шалет, главен инвестициски директор во одделот за управување со имот во „Морган Стенли“, сега е време повторно да се разгледаат „Величествените седум“ за потенцијални можности, бидејќи чиповите се „премногу купувани“.

„Иако бумот во секторот чипови и добавувачи на меморија е неверојатен,  не мислиме дека овој тренд е одржлив“, напиша Шалет во белешка објавена во вторник. „Ова не е повик за крај на циклусот, туку е повик за обнова на диверзифицираната изложеност на потенцијални победници во изградбата на вештачката интелигенција, повторно прифаќајќи некои од хиперскалерите (компании како Амазон, Гугл, итн)“. 

 

Премиите на валуација на „величествените“ во однос на остатокот од S&P 500 се ближат до историски најниско ниво

Bloomberg Mercury

 

Иако се дава зелено светло за враќање кон „седумката“, некои веруваат дека на S&P 500 дури и не му е потребно нивното учество за да ја достигне просечната цел за крајот од годината.

Самер Самана, раководител за глобалните акции и недвижнини во инвестицискиот оддел на „Велс Фарго“, не е сигурен дека подобрувањето на „величествените“ е потребно за поширокиот показател да се подобри. Тој посочува на перформансите на S&P 500, со исклучок на седумте имиња со мега-капитализација: тие моментално се во пораст од 13 отсто од почетокот на годината.

S&P 500 „потенцијално би можел да го достигне тоа ниво со останатите имиња“, рече Мелиса Браун, раководител на истражување и инвестиции во „СимКорп“ (SimCorp), кога дискутираше дали индексот би можел да достигне 7.824,09 поени до крајот на годината. „Но, со оглед на пониските тежини, тие би морале да имаат поголеми приноси за да го зголемат целиот индекс толку многу“.

Рич Приворотски, партнер во „Голдман Сакс“, е меѓу оние кои гледаат можност во групата. Приворотски е исклучително оптимистичен во однос на вештачката интелигенција, но „многу помалку убеден“ дека пазарот ги поддржува вистинските делови од вредносниот синџир. Всушност, откако ќе исчезне ретскоста, поседувањето платформа за вештачка интелигенција ќе биде подобро, додаде тој.

Како што вели Приворотски: хиперскалерите „ја поседуваат и патарината, а не само автомобилот“.