text size
Трговците на Волстрит, во исчекување на одлуката на Федералните резерви (Фед), продаваа акции, додека цената на нафтата порасна, а пазарот истовремено се подготвуваше и за резултатите на две од компаниите што најмногу инвестираат во вештачката интелигенција.
Обновувањето на насилството на Блискиот Исток ја искачи цената на нафтата Брент над 90 долари за барел, поттикнувајќи стравувања од инфлација, зголемувајќи ги приносите на обврзниците и намалувајќи го апетитот за поризични средства. Новиот пад на производителите на чипови го повлече индексот S&P 500 надолу. Nasdaq 100 загуби 1,6 отсто. Претстојните резултати на „Мајкрософт“ (Microsoft Corp.) и „Мета“ (Meta Platforms Inc.) ќе го тестираат сè помалото трпение на инвеститорите за огромните вложувања во ВИ.
Американскиот претседател Доналд Трамп за Фокс Њуз изјави дека САД силно ќе го погодат Иран по неодамнешниот напад врз воена база во Јордан. Последните судири покажуваат колку Вашингтон и Техеран се далеку од формално обновување на мировните преговори, а уште повеќе од постигнување договор за трајно завршување на војната и повторно отворање на Ормузскиот Теснец.
Нападите внесоа дополнителна неизвесност и во изгледите за монетарната политика. Се очекува Фед да ги задржи каматните стапки непроменети по завршувањето на дводневниот состанок во среда, но дел од трговците ја разгледуваат и можноста за неочекувано зголемување, бидејќи поради високата инфлација трпението е при крај.
Bloomberg
„Овој состанок доаѓа во услови на зголемена неизвесност поради новиот раст на цените на енергенсите и постојаните грижи околу инфлациските притисоци“, изјави Анџело Куркафас од „Едвард Џонс“ (Edward Jones). „Сметаме дека пониските јунски податоци за потрошувачката и производствената инфлација му даваат на Фед малку простор за маневрирање.“
Фед ќе го објави соопштението во 14 часот по локално време во Вашингтон, а претседателот Кевин Ворш ќе одржи прес-конференција 30 минути подоцна.
Нафтата расте поради ризиците поврзани со САД и Иран
Bloomberg
„Фокусот денес ќе биде насочен кон одлуката на Фед за каматните стапки и прес-конференцијата на претседателот Ворш, но технолошкиот сектор и натаму е најважната тема за инвеститорите ова лето“, изјави Мет Мејли од „Милер Табак“ (Miller Tabak).
Очajот и фрустрацијата се проширија низ заедницата на малите инвеститори во Јужна Кореја, откако акциите повторно нагло паднаа во средата, продлабочувајќи го месечниот пад на клучниот берзански индекс во земјата на рекордни 33 отсто.
Индексот Kospi во бурното утринско тргување падна за дури 13 отсто, што предизвика активирање на механизмот за привремен прекин на тргувањето втор ден по ред. „СК Хајникс“ (SK Hynix Inc.) издвои најмалку 31 милијарда долари за капитални инвестиции оваа година, откако објави шесткратно зголемување на кварталната добивка. Тоа е рекордно ниво на капитални вложувања, кое доаѓа во време на растечки стравувања околу инвестициите во капацитети за ВИ.
„И натаму сметаме дека падот на акциите на производителите на чипови и драматичниот пад на јужнокорејскиот Kospi се јасни предупредувачки сигнали за американските инвеститори“, рече Мејли. „Ако историјата е некаков показател, овие случувања би можеле да бидат важен пример за „канаринец во рудникот“ (предупредувачки сигнал за поголема опасност).
.webp){kind=icon}
