Јужнокорејските акции скокнаа 22 отсто за десет дена, микрочиповите повторно лидери

Заживувањето  на глобалното тргување со акции на компании поврзани со вештачката интелигенција ги поттурна јужнокорејските акции во технички биковски пазар, означувајќи драматичен пресврт од историскиот пад од минатиот месец.

Референтниот индекс Kospi порасна за 3,6 проценти во четврток, продолжувајќи го својот раст од најниското ниво забележано на 30 јули на околу 22 проценти. Гигантите за мемориски чипови „Самсунг“ (Samsung Electronics Co.) и „СК Хајникс“ (SK Hynix Inc.) го предводеа порастот, при што акциите скокнаа за речиси пет проценти или повеќе.

Ентузијазмот за акциите на технолошкиот хардвер се враќа поради доказите за континуирано масовно трошење за вештачка интелигенција од страна на глобалните технолошки гиганти, видливо во најновите деловни резултати.

Расположението нагло се промени од изминатите неколку месеци, кога присилните ликвидации на оптоварените со левериџ облози на производителите на чипови предизвикаа запирање на тргувањето и избришаа милијарди долари од средствата на малите инвеститори. Неодамнешните владини ограничувања за ЕТФ-те со финансиски левериџ на поединечни акции и знаците дека инвеститорите го намалуваат долгот на маргина помогнаа во стабилизирањето на пазарот.

„Мислам дека пазарот претерано падна за време на затворањето на позициите со левериџ, па затоа сегашното закрепнување е природно бидејќи одливот се стабилизира“, рече Канг Дае Квун, главен извршен директор на „Лајф Асет Менаџмент“ (Life Asset Management). „Сепак, мислам дека ќе биде тешко за пазарот да одржи континуиран раст сè додека не видиме одредена стабилизација во наративот околу вештачката интелигенција и каматните стапки во САД.“

  Корејскиот индекс влегува во технички биков пазар Bloomberg

 

Воздржаниот извештај за инфлацијата во САД во средата обезбеди дополнителен поттик, бидејќи намалената загриженост околу претстојното зголемување на стапките од страна на Федералните резерви ги поддржа американските производители на чипови. Очекувањата дека „Самсунг“ и “СК Хајникс) наскоро ќе објават планови за поврат на капиталот на акционерите, исто така, го зголемија оптимизмот во изминатите трговски денови.

Индексот Kospi е во пораст за повеќе од 60 проценти од почетокот на годината, благодарение на растот предводен претежно од мали инвеститори, но сепак е околу 25 проценти под својот врв на крајот на јуни. Падна за 22 проценти во јули, неговиот најлош месец од глобалната финансиска криза.

Пазарните превирања од минатиот месец предизвикаа рекорден број запирања на тргувањето, бидејќи дневните осцилации на Kospi од повеќе од пет проценти станаа вообичаени. Чувството на смиреност почна да се враќа, при што мерката за нестабилност падна на најниско ниво од април.

Турбуленциите се намалија откако регулаторите ги засилија мерките за ограничување на јагмата на малите инвеститори за ЕТФ-и со финансиски левериџ на поединечни акции поврзани со производителите на чипови. Дневниот промет на тие производи нагло падна откако се воведоа новите минимални барања за депозит во готово.

 

Волатилноста на корејските акции падна на најниско ниво од април наваму Bloomberg

 

Странските инвеститори беа купувачи на јужнокорејски акции во четврток, но тие остануваат нето продавачи досега оваа година, извлекувајќи повеќе од 100 милијарди долари бидејќи пазарот стана пренатрупан и прегреан. Некои странски фондови почнаа да се враќаат бидејќи распродажбата ги врати вреднувањата на поатрактивни нивоа.

Иако растечката закана од конкуренција од Кина, исто така, го олади биковскиот раст на акциите со мемориски чипови, краткорочните изгледи за побарувачката остануваат недопрени. Експанзијата на вештачката интелигенција во нови апликации и посекојдневната употреба ја поттикнува постојано зголемената побарувачка за чипови.

„Поради агентите на вештачката интелигенција и физичката вештачка интелигенција, побарувачката за меморија експлодираше, но во ова влеговме со доста ограничен производствен капацитет - и тука лежи тесното грло“, рече Куијан Жанг, специјалист за инвестиции во акции на пазарите во развој во фирмата „Бејли Гифорд“ (Baillie Gifford). „Не велиме дека светот ќе гради центри за податоци со ова темпо засекогаш, но тоа е вистинско физичко тесно грло што само неколку компании во светот можат да го решат.“