Американските акции завршија во минус поради од нов „момент на Дипсик“

Американските акции ја завршија неделата со пад, откако акциите на производителите на полупроводници ослабеа по претставувањето на модел за вештачка интелигенција од кинески стартап.

Технолошкиот индекс Nasdaq 100 се затвори со пад од 1,5 отсто, со што ја забележа најлошата недела во речиси еден месец. Акциите на „Мета“ (Meta Platforms Inc.) го предводеа падот на величествените седум. Индексот на полупроводници Philadelphia Stock Exchange Semiconductor Index падна за 1,6 отсто, со што вкупниот пад од рекордното ниво во јуни достигна 20 отсто, што според дефиницијата претставува мечкин пазар.

„Како што влегуваме во сезоната на објавување резултати, пазарот што се карактеризира со умерени распродажби и брзи закрепнувања покажува дека купувачите сè уште ја контролираат ситуацијата, но чекаат јасен сигнал од корпоративните резултати пред повторно да ги турнат акциите кон нови рекордни нивоа“, изјави Марк Хакет, главен пазарен стратег во „Нејшнвајд“ (Nationwide).

Во меѓувреме, поширокиот индекс S&P 500 падна за 1 отсто, прекинувајќи ја серијата од две последователни недели раст. Референтниот индекс ја заврши трговската сесија под својот 50-дневен подвижен просек. Сепак, „во јуни имаше неколку силни отскокнувања од тоа ниво“, изјави Дејв Луц од „Џонстрејдинг“ (Jonestrading).

Производителите на чипови навлегоа во мечкин пазар

Индексот SOX сега е во пад од повеќе од 20 отсто во однос на својот последен врв

Bloomberg

Акциите на производителите на чипови продолжија да паѓаат по неочекуваниот пробив на компанијата „Муншот“ (Moonshot), која соопшти дека нејзиниот модел Kими K3 може да им конкурира на најмоќните модели на „Опен еј-ај“ (OpenAI) и „Антропик“ (Anthropic PBC). Инвеститорите првично направија споредби со минатогодишниот „момент на Дипсик“.

Сепак, распродажбата во секторот донекаде се смири. Наративот „малку се промени во последните неколку часа“ и сега се разгледува „низ понијансирана призма“, изјави Адам Крисафули од „Витал Нолеџ“ (Vital Knowledge).

„Kими е многу голем модел, што значи дека неговото користење теоретски би барало значителни пресметковни ресурси, иако секако создава притисок врз пазарниот удел на „Опен еј-ај“ и „Антропик“, додаде Крисафули.

Загриженоста околу вештачката интелигенција и капиталните инвестиции поврзани со неа повторно се засили во четвртокот, откако „ТСМЦ“ (Taiwan Semiconductor Manufacturing Co.) ги објави своите резултати. Трговците годинава станаа покритични кон секторот на ВИ, повлекувајќи се од акциите поврзани со оваа технологија бидејќи сметаат дека високите инвестиции досега не донеле значајни приноси.

Иако акциите на производителите на чипови во четвртокот го повлекоа индексот S&P 500 надолу, мнозинството акции во референтниот индекс остварија раст, што укажува на здрава широчина на пазарот. Индексот S&P 500 Equal Weighted во четвртокот достигна рекордно високо ниво.

Повеќегодишниот глобален раст на акциите поврзани со ВИ повторно ги зголеми стравувањата на инвеститорите околу превисоките вреднувања и одржливоста на капиталните инвестиции. Тоа дополнително се засилува поради бумот поттикнат од задолжување, кој предизвика рекордна нестабилност во Јужна Кореја, како и загриженоста дека можното нагло зголемување на производствените капацитети за мемориски чипови во Кина би можело да изврши притисок врз цените.

Според Мет Брицман, висок аналитичар за акции во „Харгривс Ленсдаун“ (Hargreaves Lansdown), распродажбата на акциите на производителите на чипови повеќе наликува на „преголема изложеност на инвеститорите што сега им се враќа како бумеранг“, отколку на „ненадеен колапс“ на инвестициската приказна околу ВИ. Иако не ги потценува ризиците, Брицман не смета дека има значајна промена во среднорочната побарувачка.

„За трајно враќање кон неодамнешните рекордни нивоа ќе биде потребна потврда од најголемите инвеститори во ВИ дека нивните инвестициски планови остануваат непроменети. Ако тоа се случи, купувачите што моментално се настрана би можеле брзо да се вратат“, рече Брицман. „Засега ова повеќе личи на здраво ресетирање на најжешкиот сегмент од пазарот на ВИ отколку на крај на трендот поврзан со мемориските чипови.“

Кај поединечните акции, акциите на „Нетфликс“ (Netflix Inc.) во петокот паднаа за 7,3 отсто, откако компанијата прогнозираше втор последователен квартал на забавување на растот на приходите, што дополнително ја зголеми загриженоста на инвеститорите за иднината на стриминг гигантот. Акциите на „Интуитив“ (Intuitive Surgical Inc.) потонаа за 14 отсто, откако компанијата објави послаб раст на продажбата на роботскиот хируршки систем „Да Винчи“ (da Vinci) на американскиот пазар во вториот квартал.

Акциите на „Свитгрин“ (Sweetgreen Inc.) пораснаа за 14 отсто, прекинувајќи ја четиридневната серија падови, откако американските регулатори соопштија дека епидемијата на паразит што заразила илјадници луѓе во повеќе сојузни држави била поврзана со ренданата салата ајсберг што се служела во рестораните на „Тако бел“ (Taco Bell).

Акциите на „Кока-кола“ (Coca-Cola Co.) паднаа за 4 отсто, откако компанијата соопшти дека привремено го запрела производството на своето млеко Ферлајф (Fairlife) во САД, бидејќи неовластена трета страна добила пристап до дел од нејзините системи.