Пад на акциите на „СК Хајникс“ во Сеул по рекордното деби во САД

Акциите на јужнокорејскиот производител на мемориски чипови „СК Хајникс“ (SK Hynix) забележаа остар пад на берзата во Сеул, само неколку дена по долгоочекуваното деби на компанијата на американскиот пазар преку американски депозитарни потврди (ADR). Аналитичарите оценуваат дека главните причини се масовната реализација на добивките и пренасочувањето на капиталот кон американските хартии од вредност на компанијата.

Акциите на „СК Хајникс“ во понеделникот загубија повеќе од 13 проценти, достигнувајќи најниско ниво во последниот месец. Силната распродажба придонесе и за пад на референтниот индекс Kospi од околу осум проценти, поради што накратко беше активиран механизмот за привремено запирање на тргувањето.

Падот следуваше откако американските депозитарни потврди (ADR) на компанијата во петокот пораснаа за 13 проценти, продолжувајќи го позитивниот тренд по едно од најголемите американски берзански дебија на странска компанија.

„Листирањето на американските депозитарни потврди беше исклучително успешно, но голем дел од тој оптимизам веќе беше пресметан во цената на акциите. Денешниот пад изгледа како типична реакција од типот ’продај по објавата на веста’, а не како промена на фундаменталните показатели на компанијата“, изјави Чан Хи Ли, извршен партнер во хеџ-фондот ПКМ (Petra Capital Management).

Bloomberg

Јавната понуда на „СК Хајникс“, вредна 26,5 милијарди долари, внимателно беше следена како показател за интересот на инвеститорите за странски компании на американските берзи, но и како тест за одржливоста на ентузијазмот околу секторот на вештачката интелигенција (ВИ).

И покрај неодамнешните сомнежи за високите вреднувања на компаниите поврзани со ВИ и огромните инвестиции во секторот, интересот за понудата беше над седум пати поголем од бројот на понудените акции.

„СК Хајникс“ во последните години стана еден од најважните глобални играчи во индустријата, благодарение на својата позиција како клучен снабдувач со меморија со висок пропусен опсег (HBM) за ВИ-процесорите на „Енвидија“ (Nvidia). Од крајот на 2022 година акциите на компанијата на Корејската берза пораснаа повеќе од 25 пати, поттикнати од експанзијата на пазарот за вештачка интелигенција и рекордната побарувачка за мемориски чипови.

Во меѓувреме, растечкото учество на малите инвеститори во тргувањето со акциите на „СК Хајникс“ и „Самсунг“ (Samsung Electronics) дополнително ја зголеми нивната ценовна нестабилност. На тоа влијаеше и големата популарност на ЕТФ-овите со финансиски лост, кои ги следат движењата на акциите на двете компании.

Bloomberg

По објавувањето на прелиминарните деловни резултати на „Самсунг“ минатата недела, започна поширока распродажба во технолошкиот сектор, при што акциите на оваа компанија во понеделникот изгубија речиси 10 проценти.

Дополнителен притисок врз „СК Хајникс“ создаде и извештајот на брокерската куќа КИС (Korea Investment & Securities), според кој оперативната добивка на компанијата во последниот квартал би можела да биде околу осум проценти под очекувањата на пазарот.

Иако цените на мемориските чипови генерално растат поради ограничената понуда, аналитичарите посочуваат дека приходите на „СК Хајникс“ во голема мера зависат од HBM-меморијата, чии цени растат побавно бидејќи најголемиот дел од испораките е врз основа на долгорочни договори.

Извршниот директор на компанијата Квак Но-Џунг оцени дека недостигот од мемориски чипови најверојатно ќе продолжи и по 2030 година. Сепак, инвеститорите се сè позагрижени дека производителите забрзано ги зголемуваат производствените капацитети, што би можело да доведе до прекумерна понуда и пад на профитабилноста доколку побарувачката за ВИ-технологии ослабне.

„’СК Хајникс’ не го собра новиот капитал за исплата на дивиденди, туку за проширување на производствените капацитети. Во исто време клиентите развиваат технологии што бараат сè помалку меморија и компјутерски ресурси за ВИ-апликациите. Тоа значи дека побарувачката постепено би можела да слабее, додека понудата ќе продолжи да расте“, изјави Алексеј Мироненко, директор за инвестициски решенија во ЛВ (Leo Wealth).

Поради овие стравувања, акциите на „СК Хајникс“ сега се над 30 проценти под рекордното ниво достигнато во јуни, додека поединечни ЕТФ-ови со финансиски лост изгубија речиси 40 проценти од својата вредност откако започнаа да котираат на берзата во Сеул кон крајот на мај.

И покрај актуелната распродажба, некои аналитичари сметаат дека падот создава можност за нови вложувања. Според аналитичарот Нико Рости од МРМ (MRM Research), техничките показатели покажуваат дека акциите веќе влегуваат во зона на препродаденост.

„Можно е да следува уште еден пад во текот на наредната недела, но ние го гледаме тоа како можност за купување. Закрепнувањето на корејскиот пазар би требало позитивно да се одрази и врз американските депозитарни потврди на компанијата“, оцени Рости.