Рекордна добивка на „СК Хајникс“, но пазарите очекуваа повеќе

Јужнокорејскиот производител на мемориски чипови „СК Хајникс“ (SK Hynix) планира рекордни капитални инвестиции од најмалку 31 милијарда долари оваа година, откако објави шесткратен раст на кварталната добивка. Сепак, и покрај извонредните резултати, акциите на компанијата паднаа, бидејќи инвеститорите сè повеќе се прашуваат дали огромните вложувања во инфраструктура за вештачка интелигенција (ВИ) ќе донесат доволно поврат.

Компанијата соопшти дека капиталните расходи ќе се зголемат за околу 50 отсто и ќе достигнат најмалку 45 билиони вони, односно околу 31 милијарда долари. Во вториот квартал „СК Хајникс“ оствари оперативни маржи над 80 отсто, највисоко ниво во историјата, благодарение на недостигот од мемориски чипови, кој ги зголеми цените кон големите клиенти, меѓу кои се „Епл“ (Apple) и „Нинтендо“ (Nintendo).

И покрај силните бројки, акциите на компанијата во Сеул паднаа за 19 отсто, што ја одразува нервозата на инвеститорите околу високите очекувања поврзани со ВИ-секторот и стравувањата дека големите технолошки компании можеби градат повеќе центри за податоци отколку што реално ќе им бидат потребни.

Од „СК Хајникс“ ги отфрлија овие сомнежи, уверувајќи ги инвеститорите дека побарувачката за мемориски чипови ќе продолжи да расте и дека компанијата склучува долгорочни договори без знаци на забавување. Раководството повтори дека очекува побарувачката да ја надминува понудата најмалку до 2030 година.

Компанијата веќе се подготвува за следната генерација на меморија со високи перформанси, позната како HBM4E, која во поголеми количества треба да му ја испорачува на својот клучен клиент „Енвидија“ (Nvidia) во 2027 година.

 

Профитот на „СК Хајникс“ расте поради потребите за мемориски чипови во ВИ индустријата

 

Ценовната моќ на јужнокорејскиот производител на чипови останува силна Bloomberg

„Очекувањата на инвеститорите можеби станаа претерано високи. Но резултатите треба да се гледаат во вистински контекст - ова се извонредни бројки. Компанијата работи со полна сила и има толку голема побарувачка што мораше драстично да ги зголеми инвестициите“, изјави Џејсон Лемир, главен инвестициски директор во БВП (Bold Wealth Partners).

Сепак, и покрај континуирано силните резултати, акциите на „СК Хајникс“ се во пад од јуни, поради растечките сомнежи дали глобалните инвестиции во ВИ ќе ги оправдаат високите вреднувања на компаниите од чип-индустријата.

Дополнителен притисок создава и растот на задолженоста кај технолошките компании. Зголемената изложеност кон долгови кај компании како „СК Хајникс“ придонесе за поголема нестабилност на јужнокорејскиот пазар, при што вредноста на акциите на компанијата се намали за околу 45 отсто во последниот месец.

Инвеститорите стравуваат дека високите цени на чиповите би можеле да предизвикаат пошироко економско забавување, да ги зголемат цените на електрониката и да ги натераат производителите да го намалат производството на уреди како компјутери и паметни телефони.

Некои аналитичари веќе ги намалија прогнозите за профитот на „СК Хајникс“, укажувајќи дека растот на просечните продажни цени на чиповите можеби забавува.

Од компанијата, пак, велат дека долгорочната слика останува позитивна. Производителите на чипови очекуваат дека побарувачката ќе продолжи да ја надминува понудата, особено поради зголемените нарачки од компаниите за технологии во облак што вложуваат огромни средства во ВИ-инфраструктура.

Нето-добивката на „СК Хајникс“ во вториот квартал скокна за 1.242 отсто, поттикната и од еднократни инвестициски приходи, додека оперативната добивка порасна за 557 отсто. Сепак, оперативниот резултат и приходите не ги достигнаа највисоките очекувања на аналитичарите.

„Побарувачката е силна и приказната за ВИ-меморијата не е нарушена, но очекувањата едноставно беа поставени толку високо што дури и уште еден рекорден квартал не беше доволен“, оцени Џош Гилберт, главен аналитичар за Азија и Блискиот Исток во „Еторо“ (Etoro).

„СК Хајникс“ , заедно со „Самсунг“ (Samsung Electronics) и „Микрон“ (Micron Technology), доминира со глобалното производство на мемориски чипови. Во последните години овие компании сè повеќе го насочуваат производството кон високопропусната меморија (HBM), која се користи во ВИ-акцелераторите на „Енвидија“, што дополнително ја ограничува понудата на традиционални мемориски чипови.