Паника на берзите, инвеститорите бегаат од ризик

Глобалната распродажба на акции се продлабочи, бидејќи акциите на производителите на чипови нагло паднаа на Волстрит и во Азија, дополнително поништувајќи го годинашниот силен раст поттикнат од инвестициите во вештачката интелигенција. Американските државни обврзници добија на вредност поради побарувачката за сигурни вложувања, додека доларот ослабна.

Индексот на азиско-пацифичките акции на MSCI падна за 3,2 отсто, приближувајќи се до најниското затворање од јули. Јужнокорејскиот индекс Kospi, кој е важен показател за движењата во секторот на вештачката интелигенција, падна за 9 отсто. Акциите на водечките производители на чипови „Самсунг“ и „СК Хајникс“ загубија по 11 отсто. Taiwan Semiconductor Manufacturing Co. падна за 2 отсто, пред да објави профит над очекувањата, но послаби профитни маржи.

Фјучерсите укажаа на дополнителни загуби за американските технолошки акции, при што договорите за индексот Nasdaq 100 паднаа за 1 отсто. Се очекуваше и европските акции да отворат со пад од околу 1 отсто.

Падот на американските акции на производителите на чипови во средата беше поттикнат од најбрзиот раст на инфлацијата во последните пет месеци. Ова ги зголеми очекувањата дека Федералните резерви на САД би можеле повторно да ги зголемат каматните стапки, дури и ако во октомври направат пауза. Американските државни обврзници првично паднаа по објавувањето на податоците за потрошувачките цени, но подоцна ги надоместија загубите поради зголемениот интерес за нивните приноси, кои се блиску до највисоките нивоа во последните неколку години.

По силниот раст на акциите, инвеститорите сега се прашуваат дали милијардите вложени во вештачката интелигенција ќе донесат соодветен профит. Поради тоа, дел од капиталот се пренасочува кон побезбедни средства. Дополнителен притисок создава упорната инфлација во САД, поттикната од високите цени на нафтата поради војната на Блискиот Исток, што ја зголемува можноста централните банки дополнително да ја заострат монетарната политика.

Вреднувањето на Kospi падна на најниското ниво во историјата

Bloomberg

„Инвеститорите засега го намалуваат ризикот и префрлаат што е можно повеќе пари во сигурни средства“, изјави Хироши Намиока, главен стратег во ТД (T&D Asset Management). „Гледаме доста силно и типично повлекување од ризичните вложувања.“

Американските државни обврзници продолжија да растат на азиските пазари, бидејќи падот на акциите ја зголеми побарувачката за сигурни средства. Приносот на референтните десетгодишни обврзници падна за осум базични поени, на 5,10 отсто, додека приносот на двегодишните обврзници, кои се почувствителни на монетарната политика, се намали за седум базични поени, на 4,72 отсто.

Нестабилноста на пазарите го зголемува вниманието кон изјавите на претседателот на Федералните резерви, Кевин Ворш, кој в петок треба јавно да се обрати во Бангкок.

Индексот Bloomberg Dollar Spot падна за 0,3 отсто, откако во средата го достигна највисокото ниво од мај 2025 година.

Што велат стратезите на „Блумберг“?

„Острата распродажба на азиските акции во четвртокот потсетува на последната недела од јули, кога индексот Kospi го предводеше падот со загуба од речиси 11 отсто во една трговска сесија. Тој период се совпадна со умерена побарувачка за обврзници како сигурно засолниште, но таа не траеше долго, бидејќи повисоките цени на енергентите ги поттикнаа приносите нагоре. Овој пат може да биде поинаку, бидејќи потрес во секторот на вештачката интелигенција би можел да му наштети на економскиот раст.“

— Марк Кранфилд, стратег во „Млајв“.

Цената на златото закрепна по три дена пад и достигна околу 4.140 долари за унца. Суровата нафта брент, глобален референтен показател, падна за 1,6 отсто, на 104,45 долари за барел, бидејќи се намалија грижите за прекини во снабдувањето од Блискиот Исток.

„Изгледа дека повторно се воспоставува обратната поврзаност со акциите. Тоа значи дека капиталот се префрла во обврзници како сигурно засолниште, додека на другите пазари инвеститорите избегнуваат ризик“, изјави Ендру Тајхерст, виш стратег за каматни стапки во „Номура“ (Nomura Holdings).

Пазарите сега очекуваат зголемување на каматните стапки на Федералните резерви за околу 40 базични поени до крајот на јануари, а расте и веројатноста за зголемување во октомври.

Трговците и понатаму внимателно го следат технолошкиот сектор, откако акциите на „Корвив“ (CoreWeave) во средата паднаа дури за 17 отсто. Обврзниците на компанијата со рок на достасување во 2032 година, кои инвеститорите ги купиле по номинална вредност пред четири месеци, сега се тргуваа за помалку од 78 центи за секој долар номинална вредност.

Распродажбата на Волстрит го доведе индексот Russell 2000 во корекција. Во меѓувреме индексот што ги следи американските акции на производители на полупроводници ја забележа најдолгата серија на дневни загуби од мај 2025 година. Заврши и најдолгиот период на релативно мирно тргување на американскиот пазар од времето пред пандемијата на ковид-19.

Во меѓувреме, компанијата „Антропик“ им соопштила на потенцијалните инвеститори дека нејзините приходи во третиот квартал достигнале 16,8 милијарди долари, според извори запознаени со прашањето. Компанијата, која развива модели на вештачка интелигенција, продолжува со плановите за излегување на берза. Сепак, некои аналитичари сметаат дека резултатите се под очекувањата.